Ortalyq qalalyq kınıkalyq aýrýhana dárigerleri kóziniń torly qabyǵyna jaryq túsken áıelge joǵary tehnologıalyq ota jasady.
Quny 700 myń teńgeden asatyn operasıa mindetti áleýmettik medısınalyq saqtandyrý sheńberinde jasaldy, dep habarlaıdy Almaty-akshamy.kz aýrýhananyń baspasóz qyzmetine silteme jasap.
Oftalmologıa bólimi meńgerýshisi Gúlzat Ábraıymovanyń aıtýynsha, kózdiń torly qabyǵynyń tamyrlardan ajyraýy aýyr patologıadar qataryna jatady.
Maman sózine súıensek, kózdiń torlyq qabyǵynyń ajyraýyn dárimen nemese ekpemen emdeý múmkin emes. Kórý qabiletin qalpyna keltirýdiń birden-bir joly – kózge jedel ota jasaý. Sol sebepti pasıenttiń kóz danaryn saqtap qalý maqsatynda mıkrohırýrgıalyq manıpýlásıa jasaý týraly sheshim qabyldanǵan. Onyń ústine, kózdiń artqy torly qabyǵynyń ajyraýy operasıany qıyndata túsken.
«Kózdiń torly qabyǵy ajyraǵan kezde kórý qabileti nasharlaıdy jáne kóp jaǵdaıda pasıent janarynan aıyrylyp qalady. Ádette, torly qabyqtyń zaqymdanýyna jaraqat pen mıopıa (kózdiń jaqynnan kórmeýi), qant dıabeti, kóz ishindegi isik, qabyqtyń formasynyń buzylýy syndy jaǵdaılar túrtki bolýy múmkin. Bizdiń pasıent joǵary deńgeıdegi mıopıamen aýyrǵan. Biz oǵan vıtrektomıa dep atalatyn ota jasap, ishindegi áınek tárizdes deneni mıkrohırýrgıalyq jolmen alyp tastadyq, ornyn arnaıy suıyqtyqpen toltyrdyq», - dedi maman.
Mundaı kúrdeli hırýrgıalyq otalar joǵary tehnologıalardyń kómegimen jasalady. Sebebi óte názik bolyp keletin torly qabyqtaǵy árbir jasýsha kózdiń kórý qabiletine jaýap beredi.