Almatylyq dárigerler júrek qaǵysynyń buzylýynan ómirine qaýip tóngen pasıentterdi emdeýdiń biregeı ádisin qoldanysqa engizdi
Ońtústik astanadaǵy №7 qalalyq klınıkalyq aýrýhananyń arıtmologtary júrek qaǵysy buzylǵan naýqastarǵa kardıomonıtor ornatýdy qolǵa aldy.
Jańa ádisti aýrýhananyń Intervensıondyq kardıohırýrgıa jáne arıtmologıa bólimshesinde arıtmolog Qanat Ergeshev qoldanysqa engizdi.
Búginde júrek qaǵysynyń túrli aqaýlaryn anyqtaıtyn dıagnostıkalyq apparat klınıkanyń alǵashqy pasıentterine ornatyldy, dep habarlaıdy aýrýhana baspasóz qyzmeti. 21 jastaǵy pasıent №7 aýrýhanaǵa mı aınalý, bas aýrýy, álsizdik, esinen aıyrylý syndy sımptomdarmen túsken.
Intervensıondyq kardıologıa jáne arıtmologıa bólimshesi meńgerýshisi Sáken Anartaevtyń aıtýynsha, buǵan deıin pasıentti nevropatolog mamandar qarap, júıke júıesinde aqaý joq degen sheshim shyǵarypty.
«Pasıentti jan-jaqty tekserdik, holter qoıdyq. EKG-holter zertteýleri de júrek qaǵysynda aıtarlyqtaı aqaý joq degen nátıje berdi. Sodan soń júrek ishin elektrofızıologıalyq zertteý ádisimen tekserdik, ol da eshteńe kórsetpedi. Mundaı jaǵdaılarda pasıentterge Reveal qondyrǵysyn ornatyp, úıine jiberemiz, deıdi kardıohırýrg.
«Kardıomonıtor teriniń astyna ornatvlady. Kólemi kishigirim flesh-kartadan aspaıtyn apparat aýrýdyń júrek qaǵysyn uzaq ýaqyt boıy EKG-monıtorıng jasaýǵa múmkindik beredi. Implantty ornatý 15 mınýt qana ýaqyt alady, operasıa jergilikti jansyzdandyrý arqyly jasalady jáne pasıent aýrýhanada jatpaıdy. Apparat júrektiń elektr ımpúlstaryn jazyp otyrady, arıtmolog maman arnaıy baǵdarlama arqyly júrek talmasy ustaǵan kezde, adam esinen tanǵan sátte júrek qaǵysy qalaı booǵanyn bilip otyrady. Málimet qashyqtyqtan alynady, pasıentti aýrýhanaǵa aldyrtýdyń qajeti joq. Osylaısha júrek qaǵysyn 3 jyl boıy baqylaýda ustaı alamyz. Dıagnoz qoıylǵannan keıin apparatty alyp tastaý eshbir qıyndyq týdyrmaıdy. Bul apparat kúrdeli dıagnozdardy anyqtaýǵa, ary qaraı emdeý taktıkasyn aıqyndaýǵa múmkindik beredi», - dep túsindirdi Sáken Anartaev.
Aıtýynsha, jas jigitterdiń, mysaly sportshylardyń kenetten ólimine sebepker bolyp jatatyn jasyryn júrek dertterin anyqtaýǵa kómektesedi. Reveal apparaty júrek qaǵysynyń belgisiz sebepteri, esinen tanyp qulaý, túsiniksiz sebeptermen jıi-jıi bas aınalýy, júrek talmasy ustap esinen aıyrylý, ara-arasynda az ýaqytqa entigý, keýde qýysynyń aýyrýy, sebepsiz sharshaý syndy belgiler baıqalǵan pasıentterge ornatylady.
Esterińizge sala ketsek, josparly emniń barlyq túrleri, sonyń ishinde atalǵan prosedýra MÁMS arqyly qarjylandyrylady.