Qazir pasıenttiń jaǵdaıy jaqsardy.
Ortalyq qalalyq klınıkalyq aýrýhananyń Neırohırýrgıa bóliminiń dárigerleri joǵary tehnologıalardy paıdalana otyryp jedel túrde ota jasady. Rentgenovaskýlárlyq stentteý dep atalatyn operasıa nátıjesinde pasıentiń ómirine tónip turǵan qaýip seıilip, ınsýlt qaýpi joıyldy, dep habarlaıdy Almaty-akshamy.kz.
Ortalyq qalalyq klınıkalyq aýrýhanaǵa jetkizilgen 60 jastaǵy er adam basy aınalyp, qatty aýyrǵanyn aıtyp shaǵymdanǵan. Oǵan qosa aıaq-qoly jansyzdanyp, kórý qabileti nasharlaǵan, dep habarlaıdy OQKA baspasóz qyzmeti.
Habarlamaǵa súıensek, tekserý barysynda moıyndaǵy kúre tamyr 90 paıyzǵa tarylǵan, uıqy arterıasynyń stenozy degen dıagnoz qoıyldy.
«Kúre tamyrǵa pýnksıa jasalyp, aterosklerozǵa shaldyqqan tamyrǵa kateter ornattyq. Sol arqyly tamyrdyń tarylǵan tusyna stent qoıylyp, onyń qandy ótkizý qabileti tolyq qalpyna keltirildi. Manıpýlásıalar tolyǵymen rentgen sáýlelerdiń kómegimen, arnaıy joǵary tehnologıalyq angıografıalyq apparat arqyly júrgizildi», - deıdi Neırohırýrgıa bólimi meńgerýshisi, dáriger Marat Almatov.
Dárigerlerdiń aıtýynsha, ota sátti ótti, qazir pasıenttiń jaǵdaıy jaqsardy.
Esterińizge sala ketsek, Ortalyq qalalyq klınıkada turǵyndarǵa mıdaǵy qan tamyrlaryna jasalatyn josparly jáne shuǵyl otalardyń barlyq túri júrgiziledi. Operasıalar, sonyń ishinde joǵary tehnologıalardyń kómegimen jasalatyn manıpýlásıalar mindetti áleýmettik medısınalyq saqtandyrý esebinen tegin júrgiziledi.
