Almaty qalasynyń bas psıhıatry shildeniń shilińgir ystyǵy turǵyndardyń psıhıkalyq densaýlyǵyna áser etedi jáne jedel túrde medısınalyq kómekke júginýge keńes beredi.
Almaty qalalyq psıhıkalyq saýyqtyrý ortalyǵynyń dırektory Sapar Rahmensheev aptapta sirkesi sý kótermeı, álsizdik , uıqysyzdyq qaljyratyp, minez-qulqynda ózgerister syr bergen almatylyqtardy medısınalyq kómekke júginýge shaqyrady.
«Aptap ystyq adam aǵzasynda gormonaldy ózgeristerdiń paıda bolýyna túrtki bolady. Munyń nátıjesinde aǵzada dofamın, adrenalın, kortızol, serotonın kóp bólinedi. Buǵan qosa, búkil dúnıeni tumshalap tastaǵandaı qapyryqta uıqy buzylady, jumys isteýge zaýqy bolmaıdy. Kóńil-kúıi tez qubylyp, kúızeliske túsip ketýi ábden múmkin. Mı qyzmetiniń jumysy nasharlaıdy. Kún raıynyń qolaısyzdyǵynan adamdardyń emosıasyn basqarý múmkindigi tejeledi. Ashýlanshaq, agresıalyq minezdiń aıaq astynan paıda bolýy da ǵajap emes. Degbirsiz kúı, álsizdik, tábettiń bolmaýy psıhologıalyq jaǵdaıǵa áser etedi», - deıdi ortalyq dırektory.
Sondyqtan mazasyz kúı, degbirsizdikten qutylý úshin medısınalyq kómekke jedel júginýge keńes beredi.
Sapar Rahmensheev kún kózinen boı tasalap, suıyqtyqty kóp ishý kerek deıdi. Aptap kezinde adam terleıdi jáne aǵzadaǵy suıyqtyqty kóp joǵaltady. Ony qalpyna keltirý úshin sýdy kóp ishýge , salqyn jerde demalýǵa , alkogóldi ónimderdi tutynbaýdy eskertedi. Aptap kezde psıhıkalyq aýrýǵa shaldyqqan naýqastardyń da densaýlyǵy syr berýi múmkin deıdi ortalyq basshysy. Sondyqtan Sapar Rahmensheev kún kózine kóp shyqpaýǵa , densaýlyqty saqtaýǵa shaqyrady.