Esirtkini Almatydan jiberip otyrǵan áıeldiń isi áshkerelendi
Shyǵys Qazaqstan oblysynyń Esirtki qylmysyna qarsy is-qımyl basqarmasy İİM men prokýratýranyń úılestirýimen Óskemen qalasynda sıntetıkalyq esirtkilerdi ótkizý arnasyn jedel ázirleý nátıjesi esirtki zerthanasyn joıýmen aıaqtaldy, dep habarlaıdy Almaty-akshamy.kz Polisia.kz-ke silteme jasap.
«Refleks» arnaıy operasıasyn ótkizý kezinde polısıa qyzmetkerleri 120 gram «álfa-pvp» psıhobelsendi zaty tárkilengen jergilikti turǵyndy ustady. Ol esirtkini oǵan Almaty qalasynan bir áıel úshinshi tulǵalar arqyly joldap otyrǵanyn kórsetti. Keıinnen ol anyqtalyp, ázirleýge alyndy.
Jeltoqsan aıynyń basynda ol esirtki óndirisin uıymdastyrý úshin Óskemenge kelgen, ol úshin jabdyqtar men hımıkattardy Almaty qalasynan jeke zattar retinde jiberip otyrǵan. Kúdikti áıel páter jaldap, sıntetıkalyq esirtki óndirisine kirisken.
Onyń qylmystyq áreketke qatysýy týraly dáleldi bazany bekitkennen keıin ol ustaldy. Jalǵa alynǵan páterdi tintý barysynda árqaısysy 0,3 gramnan «álfa-pvp» bir rettik 100 dozasy, sondaı-aq býyp-túıýge daıyndalǵan esirtki tabyldy. Barlyǵy 62 gram sıntetıka alyndy, ol asa iri mólsherdegi esirtki bolyp tabylady. Sonymen qatar, páterde óndiristiń sońǵy satysyna daıyndalǵan alty lıtr esirtki eritindisi, bes lıtr prekýrsor, sondaı-aq, kúdikti esirtkini óndirý jáne ólshep-oraý kezinde paıdalanǵan gazqaǵary, elektr plıtasy, elektrondyq tarazy, 150 orama ızolenta, termoqaptardy oraý, zıp-paketter tabyldy. Osylaısha, jedel qyzmetkerlerdiń qabyldaǵan sharalary arqasynda daıyn esirtkiniń 200-ge jýyq bir rettik dozasy jáne úsh keliden artyq sıntetıka óndirýge jaraıtyn alty lıtr suıyq túrindegi esirtki zańsyz aınalymǵa jiberilgen joq. Ustalǵanǵa qatysty sot «qamaýda ustaý» túrindegi bultartpaý sharasyn tańdady. QR QK 297-babynyń 3-bóligi (Esirtki quraldaryn, psıhotroptyq zattardy, olardyń analogtaryn asa iri mólsherde ótkizý maqsatynda zańsyz daıyndaý, qaıta óńdeý, saqtaý) boıynsha qylmystyq is qozǵaldy. Jaza múlki tárkilenip, on jyldan on bes jylǵa deıingi merzimge bas bostandyǵynan aıyrýdy kózdeıdi.