Gaz qubyryn jóndeıtin slesarlar men tehnıkter 90 myń teńge jalaqy aı saıynǵy azyq-túlikten artylmaıdy dep qynjyldy.
«Almatygaz» abonenttik esepteý ortalyǵynyń 100-ge jýyq mamany aılyqty kóterýdi talap etip, narazylyq bildirdi, dep habarlaıdy Almaty-akshamy.kz.
KTK telearnasynyń aqparatyna sáıkes, jumysshylar jol shyǵyny men qural-saımandy satyp alý úshin de óz qaltasynan qarajat shyǵarady eken.
«Bizge tórt aı boldy. Osylaı jınalamyz. Qoıa turyńdar deıdi. Taǵy bir aı ýaqyt berińder deıdi. Biz bir aı ýaqyt kútip sharshadyq. Aılyǵymyz nesıemizge jetpeıdi. Tamaq, bala-shaǵa bar. Anaý-mynaý tóleıtinimiz bar. Jaǵdaıymyz jetpeı jatyr. Jolymyzǵa tólemeıdi. Jeke kólik bermeıdi. Ózimizdiń kólikpen aqsha quıyp baramyz úılerge», - deıdi slesar Elaman Janábil.
Taýy shaǵylǵan jumysshylar tańnan qara keshke deıin Almatydaǵy úılerdi aralap, gaz qubyryn jóndeıdi, tekseredi, aqaý shyqsa, qalpyna keltiredi. Oǵan qosa san túrli qujat toltyrý mindeti de osy slesarlar men tehnıkterdiń moınyna júktelgen. Qaǵazbastylyqtan sharshaǵan jumysshylar jol shyǵynynan bólek qajetti qural-saımandy da óz qarajatymyzǵa satyp alamyz dep keıidi.
Telearna málimetinshe, úılerine kógildir otyn tartqan turǵyndarǵa qyzmet kórsetetin mamandar toz-tozy shyqqan ǵımaratta otyrady.
«Kún tártibine eńbekaqyny kóterý, jumys isteýge yńǵaıly jaǵdaı jasaý máselesin qoıdyq. Meniń oıymsha, 15 kúnde naqty sheshimder qabyldaı bastaımyz. Barlyǵy retimen bolady. Búdjet negizi bólingen. Biraq qarjyny qaıta bólý kerek bolsa, ony da qarastyramyz», - dedi Qazaq Billing kompanıasynyń atqarýshy dırektory Dmıtrıı Mahrov.
Tórt aıdan beri talabymyz oryndalmady degen jumysshylar túıtkildiń túıini 15 kúnde tarqaıdy degenge senbeıdi. Gaz mamandary "ýáde etilgen merzimde mańdaı ter aqymyz kóterilmese, ashtyq jarıalap, narazylyq sharasyn jalǵastyramyz" dep tarqasty.