Shaharǵa toǵyzqumalaqtan álem chempıonatyna kelgen sheteldik delegasıaǵa rýhanı, mádenı-tanymdyq sapar uıymdastyrylǵan bolatyn. Olar qaladaǵy Kardıologıalyq ortalyqqa da baryp, zamanaýı medısına mekemesiniń tynys-tirshiligimen tanysty.
Dárigerler meımandarǵa ınovasıalyq jańa qondyrǵylardy, júrek aýrýlaryn erte anyqtaýǵa arnalǵan tehnologıalardy kórsetti. Sheteldik qonaqtar ortalyqtyń medısınalyq múmkindigine joǵary baǵa berip, Qazaqstandaǵy, onyń ishinde medısınalyq týrızmi ilgerilep kele jatqan Almatynyń densaýlyq saqtaý salasynyń tyń qadamdaryna tánti bolǵanyn jetkizdi.
«Sizderdiń tehnologıalyq damý jolyna erekshe kóńil bólip otyrǵandaryńyz qýantady. Ortalyqtaǵy kardıologıa salasynyń túrli baǵytqa bólinip, mamandandyrylǵan bólimdermen jumys isteýi – óte mańyzdy aspekt», – dedi Rýmynıa delegasıasynyń basshysy Klaýdıa Balınt.
Taqyrypqa oraı aıta ketsek, Almaty qalalyq Kardıologıalyq ortalyqta búginde 585 joǵary bilikti maman qyzmet atqarady. Onyń 120-ǵa jýyǵy kardıohırýrg. Sonaý 2007 jyldan beri úzdiksiz qyzmet kórsetip kele jatqan irgeli mekemede jyl saıyn 550-ge jýyq ashyq kardıohırýrgıalyq operasıa jasalady. Sondaı-aq, ortalyq bıyl resmı túrde júrek transplantasıasyn júrgizý boıynsha ýákiletti medısınalyq uıymdar tizimine endi.
«Bizdiń ortalyq naýqastardy jedel túrde qabyldaıdy. Almatyda jumys isteıtin, qydyryp kelgen jáne basqa memleketterden týrısik baǵdarlama boıynsha kelgen adam naýqastanyp qalǵan jaǵdaıda jedel túrde bizge kelýine, emdelýine barlyq jaǵdaı jasalǵanyn aıtyp ótý kerek. Bizge Ózbekstan, Qyrǵyzstan, Qytaı jáne Reseı memleketterinen naýqastar jıi keledi», – dedi qalalyq Kardıologıalyq ortalyqtyń dırektory Ermaǵambet Qýatbaev