Memlekettik organdar zańǵa jáne halyqaralyq mindettemelerge sáıkes barlyq qajetti kómekti kórsetedi
Reseıde áskerı mobılızasıa bastalǵaly Almatyǵa 5066 Reseı azamaty kirip, keıin 4172-si ketip qalǵan. Bul týraly Óńirlik komýnıkasıalar qyzmetiniń alańynda qala ákiminiń orynbasary Arman Qyryqbaev aıtty, dep habarlaıdy Almaty-akshamy.kz QazAqparatqa silteme jasap.
Spıker QR Prezıdenti Qasym-Jomart Toqaevtyń tapsyrmasy aıasynda Almaty qalasynyń ákimdigi Reseı Federasıasy azamattarynyń kelýine qatysty arnaıy jospar daıyndaǵanyn málim etti.
«22-27 qyrkúıek aralyǵynda Almaty qalasyna 5 066 RF azamaty kelip, onyń 4 172 qaıta shyǵyp ketken. Al qalǵan 894 reseılik qala aýmaǵynda qaldy. Bul bizdiń qala úshin úlken kórsetkish emes. Almatynyń barlyq qyzmetteri túgel qajetti jumysty oryndaýǵa daıyn. Memlekettik organdar zańǵa jáne halyqaralyq mindettemelerge sáıkes barlyq qajetti kómekti kórsetedi. Iaǵnı, eshqandaı artyqshylyq bolmaıdy», - dedi Arman Qyryqbaev.
Sondaı-aq ol barlyq memlekettik mekemeler, ásirese kóshi-qon qyzmeti shtattyq rejımde jumys istep, jaǵdaıdy baqylaýda ustap otyrǵanyn basa aıtty.
Arman Qyryqbaev qajet bolǵan jaǵdaıda 2 myńǵa jýyq tósek oryn daıyndalatynyn tilge tıek etti. Almaty qalasy ákimdiginiń Open Almaty qoǵamdyq qabyldaýynyń táýlik boıy tegin koll-ortalyǵy jumys isteıdi. Barlyq ózekti suraqtar boıynsha 1308 (mobıldi qazaqstandyq uıaly baılanys operatorynyń qońyraýy, tek Almaty qalasynda ǵana qoljetimdi) jáne +7 727 338 33 88 (qalalyq telefonnan qońyraý) telefondaryna habarlasýǵa bolady.
Budan basqa, kóshi-qon salasyndaǵy memlekettik saıasatty iske asyrý máseleleri, shetel azamattarynyń Almaty qalasynyń aýmaǵynda bolý erejeleri boıynsha jedel jeli uıymdastyryldy: +7 727 254-43-17, +7 727 254-46-97.