Almatyǵa Qytaıdyń Harbın qalasynda ótip jatqan Azıa oıyndarynyń jeńimpazy men júldegerleri oraldy, dep habarlaıdy aqshamnews.kz tilshisi.
Olardyń qatarynda - Sherzod Hashırbaev, Asylhan Asan, Evgenıı Koshkın, Aıana Joldas, Ardana Mahanova, Krıstına Sılaeva bar.
Almaty halyqaralyq áýejaıynda Harbın qalasynan qanjyǵaly kelgen qazaqstandyq sportshylardy saltanatty qarsy alý rásimi boldy. Oǵan qala ákimshiliginiń ókilderi, jankúıerler men sportshynyń týǵan-týystary qatysty.
"Men 100 metrde árdaıym sátti óner kórsetemin. Sondyqtan áý bastan júlde alam degen maqsat qoıdym. Bul qashyqtyqqa arnaıy daıyndaldym. Japondyqtar bul jarysta meniń basty qarsylastarym boldy", - dedi 100 metrge kónkımen júgirýden qysqy Azıa oıyndarynyń kúmis júldegeri Evgenıı Koshkın.
Al Evgenıı Koshkınniń jeke bapkeri Fedor Mezensev bul nátıjeden keıin shákirtinen úlken úmit kútetinin aıtty.
"Evgenıı osy qysqy Azıa oıyndaryna Ulttyq quramamen birge daıyndaldy. Ol óte jyldam sportshy. Azıada baǵdarlamasyna 100 metrlik qashyqtyqty engizgen kezde júlde alýǵa múmkindik bar ekenin bildik. Sebebi ol óte tez jyldamdyq jınaıdy. Olımpıada týraly ázirge boljam aıtý qıyn. Biraq dástúrli túrde kónkımen júgirýden Azıa sportshy alda bolatynyn eskersek, tórtjyldyq basty jarysynda da básekege túsýge ábden múmkindik bar", - dedi Fedor Mezensev.