AQSH-tan, Fransıadan, Shvesıadan, Lıtvadan, Ózbekstannan, Qyrǵyzstannan jáne Polshadan kelgen neonatologtar qazaqstandyq áriptesterimen birge 25 jáne 26 qyrkúıekte Almatyda ótip jatqan ǵylymı-praktıkalyq konferensıa alańynda kezdesti. Ol Qazaqstanda alǵash ret ótkizilip otyr jáne jańa týǵan jáne shala týǵan balalarǵa medısınalyq kómek kórsetý sapasyn jaqsartýǵa jáne elimizdegi neonataldyq ólim-jitim kórsetkishterin odan ári tómendetýge baǵyttalǵan, dep habarlaıdy aqshamnews.kz.
Bul forýmda ártúrli elderdiń jetekshi mamandary neonatologıa salasyndaǵy negizgi máselelerdi, sonyń ishinde altyn saǵatta jańa týǵan náresteni alǵashqy reanımasıalaýdaǵy, shala týǵan jáne aýrý nárestelerdi qoldaý úshin arnaıy tamaqty qoldanýdaǵy úzdik tájirıbelerdi, respıratorlyq qoldaýdyń halyqaralyq tásilderin, jańa týǵan nárestelerdiń ınfeksıalarymen kúresti, joǵary qaterli júktilik kezinde baqylaýdyń progresıvti taktıkasyn jáne basqa da ózekti taqyryptardy talqylady.
Konferensıany «Astana medısına ýnıversıteti» KEAQ jáne AYALA qaıyrymdylyq qorynyń qoldaýymen QR Densaýlyq saqtaý mınıstrliginiń bastamasy boıynsha Qazaqstan akýsher-gınekologtary men neonatologtarynyń kongresi uıymdastyrdy.
QR shtattan tys bas neonatology jáne Qazaqstan akýsher-gınekologtary men neonatologtary kongresiniń prezıdenti Bekturǵan Karın bul konferensıanyń ótkizilýi búkil Ortalyq Azıa óńirinde neonataldyq ólim-jitimdi azaıtýǵa eleýli úles qosyp, neonatologıa men perınatologıadaǵy halyqaralyq jáne óńirlik kóshbasshylarmen yntymaqtastyqty odan ári jemisti etýge kómektesedi dep esepteıdi.
«Qazir Qazaqstandaǵy neonataldyq qyzmet perınataldyq ortalyqtardyń, perzenthanalardyń myńdaǵan dárigerleri men medbıkelerin biriktiredi, olar medısınalyq kómektiń sapasyn jaqsartý úshin únemi jumys isteıdi. Sapa birinshi kezekte dárigerlerdiń de, orta medısınalyq qyzmetkerlerdiń de bilimine, tájirıbesi men daǵdylaryna baılanysty. Sondyqtan jetekshi halyqaralyq tájirıbeshilerdiń qatysýymen konferensıalar ótkizý – eldegi neonatologıany damytý úshin óte mańyzdy. Biz bilim berý bastamalarymyzdy kóptegen jyldary boıy qoldaǵany úshin AYALA qaıyrymdylyq qoryna rızashylyǵymyzdy bildiremiz», - dep atap ótti Bekturǵan Qarın.
UNICEF pen DDU derekteri boıynsha Qazaqstan táýelsizdiginiń alǵashqy jyldarynda árbir myń náresteniń 23-i bir aıǵa da jetpeı qaıtys bolǵan. Qazir jaǵdaı birneshe ese jaqsardy – 2022 jyldyń sońynda náreste ólimi 5 promılleden tómen boldy. Bul Eýropalyq odaq elderine óte jaqyn jáne Ortalyq Azıa elderi arasyndaǵy eń jaqsy kórsetkish. AYALA qaıyrymdylyq qorynyń negizin qalaýshy jáne prezıdenti Aıdan Súleımenova dál osy úzdik halyqaralyq sarapshylardyń ozyq praktıkalyq bilimderimen almasý Qazaqstanǵa neonataldyq ólim-jitim kórsetkishin aıtarlyqtaı tómendetýge qol jetkizýge kómekteskenine senimdi.
«AYALA qaıyrymdylyq qory 14 jyldan beri tegin sheberlik synyptaryn, semınarlardy uıymdastyryp keledi. Qazaqstandyq neonatologtardyń, medbıkelerdiń, akýsherlerdiń kásibı quzyretterin damytýǵa kómektesý úshin konferensıalardy qoldaıdy. «AYALA akademıasy» onlaın-platformasyn qazaq tilindegi kez kelgen mobıldi qurylǵydan qoljetimdi tegin beıne kýrstarymen belsendi túrde damytýdamyz. Birneshe jyldan beri túrli elderden neonatologtar men neonataldyq medbıkelerdi biriktire otyryp, onlaın-klýbtar ótkizýge kómektesemiz. Dárigerlerimizdiń alǵan bilimi men eń úzdik halyqaralyq tájirıbeni kúndelikti qoldanýy Qazaqstandaǵy neonataldyq medısınalyq kómek retinde naǵyz serpiliske negiz boldy», - dep atap ótti Aıdan Súleımenova.
AstraZeneca, Baxter, MedConceptService, Drager jáne Acino kompanıalary demeýshilik etken konferensıada Paris-Saclay ýnıversıtettik aýrýhanalary (Fransıa), Klıvlendtegi Cleveland Clinic Children's and Pediatric Institute (AQSH), Santaros Klinikos Vılnús ýnıversıteti aýrýhanasy, Sahlgrenska ýnıversıtetiniń Sılvıa patshaıym balalar aýrýhanasy (Shvesıa), Poznan medısına ǵylymdary ýnıversıteti (Polsha), Neonataldyq máseleler jónindegi respýblıkalyq perınataldyq ortalyq (Ózbekstan), Ana men balany qorǵaý ulttyq ortalyǵy (Qyrǵyzstan), Almaty qalasynyń Pedıatrıa jáne balalar hırýrgıasy ǵylymı ortalyǵy, Astana medısına ýnıversıteti, Túrkistan, Óskemen, Qaraǵandy, Qyzylorda, Taraz qalalarynyń oblystyq perınataldyq ortalyqtary jáne basqa da jetekshi qazaqstandyq medısınalyq mekemeler sıaqty medısınalyq ortalyqtardyń medısına ǵylymdarynyń 26 kandıdaty, profesorlary men sarapshylary baıandama jasady.