Almatyda sıntetıkalyq esirtkini óndirýge arnalǵan shıkizattyń iri kólemi tárkilendi
Sıntetıkalyq esirtkiler shyǵaratyn seh Qalqaman yqshamaýdanyndaǵy jeke úıdiń jertólesinde jumys istegen. Belgili bolǵandaı, úı ótken jyldyń qazan aıynda jas jigitke aı saıyn 300 myń teńgege jalǵa berilgen.
«Ruqsat etilgen tintý kezinde untaq jáne kesek túrindegi zattar, hımıalyq zattar salynǵan plasık ydystar, suıyqtyqtary bar kolbalar, elektrondy tarazylar jáne mefedron sıntetıkalyq psıhotroptyq zatyn óndirý kezinde qylmyskerler paıdalanǵan basqa da zattar tárkilendi. Esirtki shyǵarýǵa jaýapty – 23 jastaǵy O.esimdi azamat. Aıaqtalmaǵan medısınalyq bilimi bar jas jigit, esirtki óndirisin jolǵa qoıǵan. Jalpy, esirtki zerthanasynan birneshe keli keptirilgen zattar tárkilendi. Olardyń túsi ártúrli: aq, qara, jasyl, qońyr. Bir qaptama qońyr tústi “shóptiń” salmaǵy shamamen 160 gram, aǵynan – 500. Bul daıyn ónim jáne ony dozaǵa bólip, oraý kerek boldy. Jertóleden tabylǵannyń bári: suıyq, krıstaldy jáne untaq kúıinde sot-hımıalyq saraptamaǵa jiberildi. Sotqa deıingi tergeý bastaldy», – dedi Almaty qalalyq polısıa departamenti bastyǵynyń orynbasary Berik Ábilbekov.
Polısıa qyzmetkerleri jedel túrde esirtki bıznesine taǵy bes adamnyń qatystylyǵyn anyqtady, olardyń ekeýi 23 jáne 19 jastaǵy qyzdar. Olar – Túrkistan jáne Almaty oblystarynan kelgender. Olardyń mindetterine daıyn esirtkilerge betbelgi qoıý kirdi. Kúdiktiler qamaýǵa alyndy.
«Qylmysty uıymdastyrýshynyń aıtýynsha, ol Telegram-daǵy kýratordyń nusqaýy boıynsha áreket etken. Zerthanaǵa arnalǵan quramdas bólikterdi Almaty oblysy Talǵar aýdany aýmaǵyndaǵy “betbelgiler” arqyly alǵan. Bir apta ishinde ol 2-3 kelige jýyq sıntetıkalyq esirtki jasaǵan, jumysy úshin bıtkoınmen apta saıyn 280 myń teńge kóleminde qarajat alyp otyrǵan. Saraptama qorytyndysy boıynsha, tárkilengen zattar - jalpy salmaǵy 4 keliden asatyn “A-PVP” sıntetıkalyq esirtki zaty, 312 gram mefedron jáne 15 lıtr týlýol (prekýrsor). Shıkizat baǵasy 150 mln teńgeni quraıdy», – dedi Ábilbekov.