Jeke menshik stomatologıalyq klınıkalar qatysyp jatyr.
Ońtústik astanada Halyqaralyq balalardy qorǵaý kúnine oraı «Balalarǵa kúlki syıla» dep atalatyn shara bastaldy. Maýsymnyń 16-na deıin jalǵasatyn aksıa barysynda 18 jasqa deıingi balalar stomatologıalyq qyzmetterdi tegin paıdalana alady, dep habarlaıdy Almaty-akshamy.kz.
Medısınalyq saqtandyrý qory Almaty fılıalynyń muryndyq bolýymen qolǵa alynǵan aksıaǵa Qor bazasyndaǵy jeke menshik stomatologıalyq klınıkalar qatysyp jatyr.
«Bul balalarǵa demalys kezinde tisterin emdetip alýǵa múmkindik beretin tamasha aksıa. Shara tistiń shirýine jol bermeı, ýaqtyly emdeý máselesine balalar men ata-analardyń nazaryn aýdarý maqsatynda ótkizilip otyr», - deıdi «Almaty qalasynyń balalar stomatologıalyq klınıkasy» JSHS dırektory Tóretaı Rýzýddınov.
Ashyq esik kúnderiniń kestesi:
- «Almaty q. balalar stomatologıalyq klınıkasy» JSHS – 1 maýsym
- «BayanSulu Clinic» JSHS – 2 maýsym
- «Taýgúl-dent» JSHS – 3 maýsym
- «VITA DENTAL CLINIC («Oblystyq balalar stomatologıalyq emhanasy» JSHS) – 4 maýsym
- «Dr.Bibi Clinic» JSHS – 6 maýsym
- «Almaty q. ortalyq stomatologıalyq emhanasy» JSHS – 7 maýsym
- «Áleýmettik balalar stomatologıasy» JSHS – 8 maýsym
- «Khan Stom» JSHS – 10 maýsym
MSQ Almaty fılıaly dırektorynyń orynbasary Janar Kenjebaevanyń aıtýynsha, bul klınıkalar balalarǵa saqtandyrý esebinen josparly stomatologıalyq kómek túrlerin de kórsetedi.
«Mindetti áleýmettik medısınalyq saqtandyrý arqyly júkti áıelder men 18 jasqa deıingi balalarǵa stomatologıalyq kómek tegin kórsetiledi. Olardyń arasynda tisti jansyzdandyrý, hımıalyq plomba salý, terapevtiń qabyldaýy, pýlpıt pen perıdontıtti emdeý, flúoroz, gıpoplazıa kezinde tistiń anatomıalyq pishinin tolyq qalpyna keltirý, tisti hırýrgıalyq jolmen julý, t.b. qyzmetter kiredi», - dep atap ótti Janar Kenjebaeva.
Esterińizge sala ketsek, «Balalarǵa kúlki syıla» sharasy barysynda kishkentaı pasıentterge MÁMS paketine kirmeıtin ortondonttyq keńes kórsetilmek. Jaq pen tis qurylymyndaǵy aqaýlardy arnaıy qurylǵylardyń kómegimen túzetkisi keletinder ortodont mamannyń konsýltasıasynda bolyp, tegin keńes ala alady.