2 qarashada Qazaqstan Prezıdenti Qasym-Jomart Toqaev “Raqymshylyq jasaý týraly” Zańǵa qol qoıdy.
Qandy qańtar oqıǵasy kezinde beıbit sherýmen birge alańǵa shyǵyp, artynan arandatýshylardyń toryna túsip qalǵandar kóp. Atalǵan Zań boıynsha osyndaı qańtar oqıǵasyna qatysýshylardyń birazy aqtalyp, ártúrli deńgeıde qylmys jasaǵandarǵa raqymshylyq jasalmaq, dep habarlaıdy Almaty-akshamy.kz Polisia.kz-ke silteme jasap.
Jyl basynda elimizdegi eń úlken megopolıs – Almaty qalasyndaǵy № 72 mekemesine (tergeý ızolátory) qańtar oqıǵasyna qatysty 563 adam qamalǵan bolatyn. Búginde onyń 65-i jazasyn óteý oryndaryna ketse, 416 adam túrli negizder boıynsha qamaýdan bosatyldy. Qazir tergeý ızolátorynda qańtar oqıǵasyna qatysty 82 adam ustalýda. “Raqymshylyq jasaý týraly” zańyna baılanysty osy kúdiktilerge qatysty jumystar júrgizilýde. Olardyń arasynda merziminen buryn shartty túrde bosatylatyndar men jazasyn jeńildetýge jatatyndar bar, kerisinshe 3 adamnyń jasaǵan qylmysy raqymshylyq jasaýǵa jatpaıdy.
“Raqymshylyq jasaý týraly” QR Zańyn qoldaný úshin barlyq materıaldar Almaty qalasynyń aýmaqtyq sotyna jiberildi. Atalǵan Zańda terrorlyq, ekstremıstik, sybaılas jemqorlyq qylmystar, memleketke opasyzdyq jasaý, azaptaý, jappaı tártipsizdikterdi uıymdastyrý, kámeletke tolmaǵandardyń jynystyq qol suǵylmaýshylyqtaryna qarsy qylmystar jasaǵan adamdarǵa raqymshylyq jasalmaıtyny kórsetilgen.