Almaty táýlik boıy jumys isteıtin kitaphanalar tájirıbesin belsendi túrde engizip otyr.
Aıta keteıik, bir jyl buryn, maýsym aıynda ótken Ulttyq quryltaıdyń ekinshi otyrysynda Memleket basshysy Qasym-Jomart Toqaev táýligine 24 saǵat jumys isteıtin kitaphanalar qurý týraly bastama kótergen bolatyn.
Almatynyń eki kitaphanasy – Jambyl atyndaǵy qalalyq jasóspirimder kitaphanasy men Alatau Creative Hub ortalyǵynyń kitaphanasy 2023 jylǵy qyrkúıek aıynan beri (2023-2024 oqý jyly) oqyrmandardy táýlik boıy qabyldap keledi. Almatynyń Mádenıet basqarmasy bul ádistemeniń oqýshylar, stýdentter, magıstranttar, sondaı-aq doktoranttar arasynda úlken suranysqa ıe ekenin atady. Osyǵan baılanysty megapolıstiń Abaı dańǵyly, 141 mekenjaıynda ornalasqan taǵy bir kitaphanasy endi 24/7 rejıminde jumys isteıdi.
«Qazir Almatyda úsh kitaphana oqyrmandardy 24 saǵat boıy qabyldaıdy. Kez kelgen adam ózine yńǵaıly ýaqytta kele alady. Jańa jumys formaty engizilgen soń kelýshiler sany da artty. Naqtyraq aıtsaq, 2023 jylǵy qyrkúıek aıynan beri Jambyl atyndaǵy qalalyq jasóspirimder kitaphanasyna 27 650 adam kelse, Alatau Creative Hub ortalyǵynyń kitaphanasy 28 myń oqyrmanǵa qyzmet kórsetken. Jalpy almatylyqtar kitap oqyǵandy jaqsy kóredi. Tek qalalyq kitaphanalardaǵy kórsetkishterge toqtalsaq, oqyrmandar jyl saıyn kem degende úsh mıllıon ret kelip-ketedi», – dep habarlaıdy Almaty qalasynyń Mádenıet basqarmasy.
Aıta keteıik, Almatyda 28 qalalyq kitaphana jumys isteıdi. Olardyń 95%-y jańǵyrtýdan ótti: materıaldyq-tehnıkalyq baza men kitap qory jańartylyp, jaıly oqý zaldary men ınternet-zaldar paıda boldy. Sondaı-aq, Almaty kitaphanashylary oqyrmandarǵa qyzmet kórsetý sapasyn arttyrý maqsatynda alǵash ret Ońtústik Koreıa, Germanıa jáne Shveısarıadaǵy úzdik kitaphanalarda taǵylymdamadan ótip keldi.
