Úlken saǵat qaıta qalpyna keledi
Almatyda buryn «Saıahat» avtobeketi turǵan aýmaqta jańa turǵyn úı kesheni, mektep, balabaqsha, saıabaq salynyp, úlken saǵat qaıta qalpyna kelýi tıis. Bul týraly Almaty qalasy ákimdiginiń baspasóz qyzmetinen málim etti, dep habarlaıdy Almaty-akshamy.kz QazAqparatqa silteme jasap.
Almaty ákimdiginiń málimetinshe, Raıymbek dańǵylynyń soltústigi men Súıinbaı dańǵylynyń shyǵysynda ornalasqan aýdany 4,4 ga «komersıalyq úı-jaılar men jerasty parkıngi bar kópfýnksıonaldy turǵyn úı kesheni» nysanaly maqsaty bar jer ýchaskesi 2018 jyldyń qazan aıyndaǵy №3852 menshikke berý sharty negizinde «Sayahat Realty» JSHS-ne tıesili. Sonymen birge, egjeı-tegjeıli josparlaý jobasyna sáıkes, «Saıahat» avtobeketiniń aýdany – Pýshkın kóshesiniń (Raıymbek dańǵylynan Gogol kóshesine deıin) avtokólik joly boıyndaǵy aýmaqty qaıta qurý jobasyna (master-jospar) kiredi.
«Atalǵan jer ýchaskesi quqyq belgileıtin qujattar negizinde zańdy tulǵanyń menshiginde. Menshik ıesiniń aıtýynsha, aýmaqta jalpy bilim beretin mektep jáne balabaqsha salý jumystary josparlanǵan. Almatylyqtardyń esinde qalǵan úlken saǵat qaıta qalpyna keltiriledi. Sondaı-aq, shamamen 1,3 gektar aýmaqta saıabaq salý josparlanyp otyr. Qazirgi tańda qurylys-montajdaý jumystary (QMJ) júrip jatqan joq. Qurylys salýshy barlyq zańnamalyq rásimnen ótken soń ǵana QMJ-ǵa kirise alady. Qurylys jumystaryn, onyń ishinde QMJ-nyń bastalý jáne aıaqtalý merzimin baqylaý Almaty qalasynyń qala qurylysyn baqylaý basqarmasynyń quzyretine kiredi», - dep habarlady ákimdikten.
Sondaı-aq, vedomstvoda megapolıstiń jańa bas jospary boıynsha kólik-transplantasıalaý toraptary (TPÝ) qalanyń shyǵys jáne batys bóliginde: Batys TPÝ – «Barlyq» bazarynyń orny, Shyǵys TPÝ – Almaty-2 vokzalynyń mańynda qarastyrylǵanyn habarlady.
Eske salsaq, Almatydaǵy «Saıahat» avtobeketi 2008 jyly súrilgen bolatyn. Qala ákimdigi sol kezde bul sheshimdi kólik-transplantasıalaý torabynyń ózektiligi bolmaýyna baılanysty qabyldaǵan. Sonymen qatar, avtobeket Almaty qalasynyń tarıhı jáne sáýlet eskertkishteriniń tizimine enbegen.
Sondaı-aq, buǵan deıin Almaty ákimi Erbolat Dosaevtyń Jetisý aýdanynyń turǵyndarymen kezdesýi kezinde aýdan ákimi Gúlnar Kókebaeva «Saıahat» avtobeketi mańynan jańa emhana salynatyny týraly aıtqan edi.