Memlekettik qýyrshaq teatrynyń ártisteri 3-4 shildede Kanada kórermenderine «Romeo jáne Djýletta» qoıylymyn usynady. 88-shi teatr maýsymyn aıaqtaǵan teatr ujymy Ottavada ótetin The First international Ottawa Puppet festıvaline qatysyp jatyr.
«Biz qýyrshaq teatrynyń jan-jaqty damýyna úlken mán beremiz. Bizdiń ártister osy maýsymda Germanıa, Túrkıa jáne Reseıdegi beıindi mekemelerde bilim alyp qaıtty. Odan bólek, shyǵarmashylyq ujym yńǵaıly jaǵdaıda jumys isteýi úshin, ákimniń tapsyrmasy boıynsha, teatr ǵımaratyn jóndeý jáne tehnıkalyq jabdyqtaryn jańǵyrtý jumystaryn júrgizdik. Taǵy bir jaqsy jańalyq — teatr maýsymynyń basynda ártisterdiń jalaqysy 30% artty. Jalpy, biz jemisti nátıjege jetkizetin barlyq bastamalardy qoldaýǵa daıynbyz», - dep habarlady Almaty qalasy Mádenıet basqarmasy.
Kanadalyq festıválge qatysý úshin Qýyrshaq teatry óziniń repertýarynan «Romeo men Djýletta» spektaklin tańdady, onyń rejıseri – Dına Jumabaeva. Shyǵarmashylyq toptyń sheberligi men biliktiliginiń arqasynda dál osy qoıylym buǵan deıin de bedeldi respýblıkalyq jáne halyqaralyq festıváldarda kóptegen marapatqa ıe boldy. Máselen, Bolgarıada ótken «Altyn delfın» Halyqaralyq teatr festıvalinde «Gran-Prı», «Úzdik er adam róli» jáne «Úzdik debút» syılyqtaryn jáne «Syn - shyn bolsyn» respýblıkalyq teatr festıvalinde «Gran-Prı» jeńip alǵan edi.
Aıta keteıik, Qýyrshaq teatry – kanadalyq kórermender aldynda óner kórsetetin Qazaqstannyń alǵashqy teatry.