Konferensıanyń basty maqsaty - balalar densaýlyǵyn saqtaý men nyǵaıtý
Pedıatrıa jáne balalar hırýrgıasy ǵylymı ortalyǵynyń sábı densaýlyǵyn, bala amandyǵyn basty nazarǵa alyp otyrǵanyna bıyl - 90 jyl. 6-7 qazan kúnderi Almatyda Pedıatrıa jáne balalar hırýrgıasy ǵylymı ortalyǵynyń 90 jyldyǵyna arnalǵan «Qazaqstan pedıatrıasy: ótkeni men búgini jáne bolashaǵy» atty halyqaralyq ǵylymı-tájirıbelik konferensıa ótedi, dep habarlaıdy Almaty-akshamy.kz.
Mereıtoılyq sharaǵa Qazaqstan Respýblıkasynyń Densaýlyq saqtaý mınıstri A.Ǵınaıat, S.J.Asfendıarov atyndaǵy QazUMÝ-dyń rektory M.E.Shoranov, Pedıatrıa jáne balalar hırýrgıasy ǵylymı ortalyǵynyń Basqarma tóraǵasy A.Z.Qusaıynov, D.Rogachóv atyndaǵy ulttyq medısınalyq zertteý ortalyǵynyń Bas dırektory G.A. Novıchkova, Belarýs Ulttyq ǵylym akademıasynyń korespondent-múshesi, profesor, onkogematolog O.V.Aleınıkova, sonymen qatar Qazaqstannyń barlyq aımaqtarynan jáne Belarýs, Reseı, Tájikstan, Ózbekstan, Ulybrıtanıa, Germanıa, Ýkraına, Chehıa elderiniń ókilderi, balalar dárigerleri, ǵylymı ınstıtýttardyń jetekshi mamandary men basshylary, sondaı-aq medısınalyq JOO profesorlary qatysady.
Konferensıanyń basty maqsaty - balalar densaýlyǵyn saqtaý men nyǵaıtý, balalarǵa sapaly medısınaly qyzmet kórsetýdi uıymdastyrý, balalardy emdeý men dıagnostıkalaýdaǵy ózekti meselelerin talqylaý, elimizdegi balalar densaýlyǵy qyzmetin jaqsartý.
İs-sharanyń uıymdastyrýshylary: QR Densaýlyq saqtaý mınıstrliginiń qoldaýymen Pedıatrıa jáne balalar hırýrgıasy ǵylymı ortalyǵy jáne Qazaqstan Pedıatrlar Odaǵy.
Alqaly basqosýda Pedıatrıa jáne balalar hırýrgıasy ǵylymı ortalyǵynyń ótkeni men búgini, jetistigi men damýy sóz bolyp, elimizdegi pedıatrıalyq qyzmettiń baǵyt-baǵdary saralanady.
Eki kúnge sozylatyn halyqaralyq konferensıa «Pedıatrıa jáne neonatologıanyń ózekti máseleleri», «Balalar hırýrgıasy: baǵyttary men zamanaýı ádisteri», «Orfandyq aýrýlardy dıagnostıkalaý men emdeýdiń zamanaýı máseleleri», «Onkologıalyq jáne gematologıalyq aýrýlardy dıagnostıkalaý men emdeýdiń zamanaýı tehnologıalary», «Patologoanatomıalyq dıagnostıkanyń ózekti máseleleri», «Balalarǵa medısınalyq kómek kórsetýdi uıymdastyrýdaǵy meıirgerler róli» atty seksıalyq jumys taqyryptary aıasynda ótedi.