Qala basshysynyń tapsyrmasymen alǵash ret 42 jyl ishinde qolǵa alynǵan jańǵyrtý jumystary 2024 jyldyń qyrkúıeginen bastap bıylǵy naýryz aıyna deıin jalǵasty. Bul rette, Úlken konsert zalynyń tarıhı kelbeti men túpnusqalyq akýstıkalyq dızaıny tolyq saqtaldy. Kórermen zalynyń ústinde aspaly shamdardan turatyn erekshe dybys tolqyndaryn basqarý júıesi bar.
Aıta keteıik, Oqýshylar saraıynyń bir bóligi sanalatyn Úlken konsert zaly jergilikti mańyzy bar memlekettik tarıhı eskertkish. Ol 1983 jyldan beri jumys istep keledi jáne balalar men jasóspirimderge arnalǵan mádenı-tanymdyq is-sharalar ótkizetin eń iri alańnyń biri retinde tanymal.
Konsert zalynyń jalpy aýmaǵy 1 168 sharshy metr. Bul aýmaqqa amfıteatr, eki kórermender balkony, tórt tehnıkalyq loja jáne sahna kiredi. Jańǵyrtý jumystary barysynda ınterer elementteri 1 639 sharshy metr aýmaqta qalpyna keltirildi. Dekoratıvti gıpstik elementter, kórermen oryndyqtary men eden jabyny jańartyldy. Sonymen qatar, zalǵa sońǵy býyn sıfrlyq mıksherlik púlti men joǵary halyqaralyq standartqa sáıkes keletin keń jolaqty keńistiktik dybys júıesi ornatyldy. Jaryqtandyrý júıesi 100-den astam projektor men sofıtteri bar dınamıkalyq jaryq júıesimen tolyqtyryldy, bul túrli formattaǵy is-sharalarǵa beıimdelgen.
Jańǵyrtý aıasynda konsert zalynyń tarıhynda alǵash ret aınalmaly sahna mehanızmi, barlyq sahnalyq qurylym, kýlısalar, bas perde jáne elektrmen jabdyqtaý júıesi tolyǵymen jańartyldy. Sondaı-aq, sıfrlyq basqarý júıesi bar joǵary tehnologıalyq LED-ekrandar ornatyldy.
Jańartylǵan zal jas almatylyqtar úshin is-sharalar aýqymyn aıtarlyqtaı keńeıtedi. Teatr qoıylymynan bastap, ınteraktıvti shoý men sıfrlyq forýmǵa deıin respýblıkalyq jáne halyqaralyq deńgeıdegi is-sharalar ótkizilip, jylyna keminde 40 000 balany qamtý josparlanǵan.
Almaty ákimi Erbolat Dosaevtyń aıtýynsha, Úlken konsert zalynda N.Sas atyndaǵy balalar men jasóspirimder teatrynyń qoıylymdary da ótedi, sebebi balalar teatrynda qazir rekonstrýksıalaý jumystary qolǵa alynǵan.
Qala basshysy jańǵyrtýdyń kelesi kezeńinde Oqýshylar saraıynyń syrtqy qasbetin jańartý jáne aınalasyn kórkeıtý josparlanyp otyrǵanyn atap ótti.
Búgingi tańda Oqýshylar saraıynda 8 bilim berý baǵyty boıynsha 237 úıirme men seksıa jumys isteıdi. Atap aıtqanda, kórkem-estetıkalyq jáne qoldanbaly óner, balalar mýzyka mektebi, jaz baǵytyna arnalǵan mýzyka mektebi, ekologıalyq-bıologıalyq bólim, týrısik-ólketaný bólimi, balalar bastamalaryn úılestirý bólimi, sport bólimi jáne ǵylymı-tehnıkalyq shyǵarmashylyq bólimi.
Jańǵyrtýdan ótken konsert zaly Oqýshylar saraıynyń úıirmelerine qatysatyn 15 100 balaǵa jáne balalar mýzyka mektebinde, Ortalyq Azıadaǵy jalǵyz balalar jaz mektebinde jáne mýzyka-estetıkalyq baǵyttaǵy úıirmelerde (qobyz, dombyra, fortepıano, saksofon, jetigen, skrıpka, fleıta, vokal, terme) bilim alatyn 2 348 jas mýzykantqa óner kórsetý múmkindigin beredi. Estradalyq-sımfonıalyq, jaz, dombyra orkestrleri, skrıpka ansámblderi men hor ujymdary úshin arnaıy jaǵdaı jasalǵan.
