Qoldanystaǵy marshrýttardyń syzbasyna ózgerister engizildi.
Almaty máslıhatynyń aǵymdaǵy jylǵa arnalǵan jergilikti búdjetti naqtylaý jónindegi XXX sesıasy barysynda qaladaǵy qoǵamdyq kólik máselesi sóz boldy, dep habarlaıdy Almaty-akshamy.kz.
«Búgingi kúni qalamyzdyń qoǵamdyq kólik júıesi 158 baǵyttyq jeliden turady. Ózderińizge málim, qoǵamdyq kólikte júrý quny 80 tenge. Qoǵamdyq kóliktiń shynaıy eseptik quny bekitilgen tarıften áldeqaıda joǵary, shamamen orta eseppen 300 tengeni quraıdy. Sol sebepti barlyq marshrýttar áleýmettik mańyzy bar dep tanylǵan», - dedi Almaty qalasy qalalyq utqyrlyq basqarmasy basshysynyń m.a. Ernur Ábjahan.
Onyń aıtýynsha, QR «Avtomobıl kóligi týraly» zańynyń 14-baby 1-tarmaǵynyń 5-tarmaqshasyna sáıkes, oblystardyń, respýblıkalyq mańyzy bar qalalardyń, astananyń jergilikti ókildi organdary áleýmettik mańyzy bar qatynastardyń tizbesin aıqyndaıdy.
«Buǵan deıin 2020 jyldyń 18 naýryzynda baǵyttardyń tizimi bekitilgen bolatyn. Jolaýshylardyń qajettiligine jáne qalaǵa qosylǵan aýdandardy qamtýdyń ulǵaıýyna baılanysty jańa baǵyttar uıymdastyrylyp, qoldanystaǵy marshrýttardyń syzbasyna ózgerister engizildi.Osyǵan baılanysty, Almaty qalasynda áleýmettik mańyzy bar qatynastardyń tizbesin aıqyndaý maqsatynda sizderge 161 baǵyttan turatyn tizbeni bekitý úshin sheshiminiń jobasy engizildi», - dedi Ernur Ábjahan.