Qańtardaǵy tártipsizdik kezinde Almatydaǵy Kaspi Bank fılıalyn tonaǵan kúdiktiler ustaldy. Bul týraly QR İİM Tergeý departamentiniń basshysy Sanjar Ádilov aıtty, dep habarlaıdy almaty-akshamy.kz
«Polısıanyń jedel múmkindigimen qatar, bul qylmystardy ashýǵa sanaly azamattardyń belsendi kómegi de yqpal etti. Olar keńinen túsindirý jumysynyń nátıjesinde oqıǵa kezinde túsirilgen beınematerıaldardy usyndy. Osyndaı vıdeolardyń biriniń arqasynda Almaty qalasynda bir top jas jigitttiń «Lýnapark» balalar oıyn-saýyq ortalyǵynan urlanǵan teledıdarlar men basqa da turmystyq tehnıkany avtokólikke tıep urlaǵany anyqtaldy. Basqa vıdeoda Almaty qalasyndaǵy Kaspi Bank fılıalyna shabýyl jasalǵany kórindi. Onda bir top adam qylmys ornynda, ıaǵnı aınalasyndaǵylarǵa jáne ótip bara jatqan kólikterge nazar aýdarmaı tonalǵan múlikti bólisken», - dedi Sanjar Ádilov Ortalyq komýnıkasıalar qyzmetinde.
Osy oraıda ol eki jaǵdaıda da kúdiktiler anyqtalyp, qamaýǵa alynǵanyn aıtty.
«Azamattar usynǵan beınematerıaldar qylmyskerlerdi áshkereleýge kómektesedi jáne zattaı dáleldeme retinde paıdalanylady», - dedi Tergeý departamentiniń basshysy.