Almaty qalasynyń Qoǵamdyq densaýlyq saqtaý basqarmasy Serikjan Sabyralıevtiń eńbek shartynyń merzimi aıaqtalýyna baılanysty 2025 jyldyń 13 qazanynan bastap Ortalyq qalalyq klınıkalyq aýrýhana (OQKA) dırektory qyzmetinen bosatylǵanyn habarlady, dep habarlaıdy Aqshamnews.kz tilshisi.
Báıge jarıalanǵanǵa deıin aýrýhanaǵa ýaqytsha basshy bolyp Almat Chormanov taǵaıyndaldy. Ol buǵan deıin Qarasaı kópsalaly ortalyq aýdandyq aýrýhanasynda jumys istegen.
Anyqtama boıynsha, Almat Tursynjanovıch Chormanov — hırýrg, medısına ǵylymdarynyń kandıdaty, qaýymdastyrylǵan profesor, qoǵamdyq densaýlyq saqtaý magıstri; 24 jyldyq eńbek ótiliniń 18 jylyn klınıkalyq jáne basqarýshylyq qyzmetke arnaǵan. Syzǵanov atyndaǵy Ulttyq ǵylymı hırýrgıa ortalyǵynda baýyr hırýrgıasy bóliminiń dárigeri, Almatydaǵy №7 qalalyq klınıkalyq aýrýhanada hırýrgıa jónindegi bas dárigerdiń orynbasary, keıin Syzǵanov ortalyǵynda bas dáriger jáne basqarma tóraǵasynyń ǵylymı‑klınıkalyq jáne ınovasıalyq qyzmet boıynsha orynbasary qyzmetterin atqarǵan.
Eske salaıyq, Serikjan Sabyralıev 2023 jyly OQKA dırektory bolyp Narıman Tabynbaevtyń ornyna kelgen. Ol kezde aýrýhanada birqatar pasıentten VICH anyqtalýyna baılanysty úlken daý týǵan. Komısıa 593 baılanysta bolǵan adamdy jáne donorlardy tekserip, olardyń arasynan jańa juqpa anyqtalmady. Epıdemıologıalyq tergeý ınfeksıa ınvazıvti prosedýralar kezinde medısına qyzmetkerleriniń kinásinen juqqanyn kórsetti.