Almatyda Tájikstan Respýblıkasynyń Hatlon oblysy taýar óndirýshileriniń qatysýymen aýyl sharýashylyǵy jármeńkesi ótedi, - dep habarlaıdy Aqshamnews.kz tilshisi.
2025 jyly 20–21 qyrkúıekte Almaty qalasynyń Alataý aýdanynda aýyl sharýashylyǵy jármeńkesi ótedi. İs-sharaǵa Tájikstan Respýblıkasynyń Hatlon oblysynan kelgen taýar óndirýshileri qatysady. Jármeńke «Alataý» teatrynan (Momyshuly jáne Ýnıversıada kósheleriniń qıylysy) aldyndaǵy avtoturaq alańynda uıymdastyrylady.
Jármeńkege 40 fermer qatysyp, Almatyǵa 200 tonnadan astam balǵyn aýyl sharýashylyǵy ónimin alyp keledi. Saýda sórelerinde maýsymdyq jemis-jıdekter men kókónister, tabıǵı keptirilgen jemister jáne shyǵys táttileri bolady. Qala turǵyndary men qonaqtary ónimdi tikeleı óndirýshilerden qoljetimdi baǵamen satyp ala alady.
Jármeńke Qazaqstan men Tájikstan arasyndaǵy saýda-ekonomıkalyq yntymaqtastyqty nyǵaıtýǵa, fermerlerdi qoldaýǵa jáne tutynýshylardy sapaly, balǵyn ónimdermen qamtamasyz etýge baǵyttalǵan.