Esentaı ózeniniń arnasy jóndelip, ajary kirip qaldy
Almaty.tv saıtynyń aqparatyna súısensek, Esentaı ózeniniń boıynda jóndeý jumystary 2020 jyly mamyr aıynda bastalǵan. Buǵan deıin qaraýsyz jatqan ózenniń jaǵasy qazir adam tanymastaı ózgergen. Bir ereksheligi – munda kólik pen velosıped joldary joq. Tek 1,6 shaqyrym tas jol men 800 metrlik aǵashtan jasalǵan jaıaý júrginshiler joly salynǵan.
«Jaǵalaýlarynyń bárin bekitý jumystary, sonymen qatar, jaıaý júrginshiler joly jasaldy. Osy joldyń boıyna 3 myńnan astam butaly aǵashtardy egý jumystary bar. Aǵashtar jáne 3 myń sharshy metr jasyl kópjyldyq ósimdikter egiledi», – dedi qalalyq jasyl ekonomıka basqarmasy basshysynyń orynbasary Serik Ádilbaev.
Munda ózen arnasyn tazartý jumystary da qolǵa alynypty. Jóndeý kezinde qoqystan bólek, 20 myń tekshe metr tas shyǵarylyp, qaýipsizdik sharalary qamtamasyz etilgen. Jaǵalaýdyń adam júretin bóligine sý jańa balalar alańy salynyp, jaryq baǵandary men oryndyqtar qoıylǵan. Al ekinshi bóligi tabıǵı qalpynda saqtalyp qaldy. Bul qalanyń dál ortasynda boı kótergen biregeı parktiń tabıǵatpen úılesim tabýyna yqpal etedi deıdi mamandar.
«Eń aldymen, tabıǵı jer bederin saqtaý kerek. Mysaly, ózenniń ózindik kúshi bar. Eger sý tasqyny nemese sel bolsa, qatty sý aǵyny óz jolynda bárin buzyp ótedi. Al ózen arnasyndaǵy burylystar joǵary jyldamdyqpen aqqan sýdy toqtata alady. Iaǵnı, bul tabıǵı jolmen qalyptasatyn qubylys. Al munda dál osy beder saqtalyp otyr. Bul jergilikti turǵyndardyń qaýipsizdigin qamtamasyz etedi», – dedi ekolog Tımýr Eleýsizov.
Abattandyrylatyn aýmaq Kishi Almaty ózenin bólip turatyn dambydan bastap, Ospanov kóshesine deıin jalǵasady. Aldaǵy ýaqytta abattandyrý jumysy bitken soń, jaıly orta qalyptastyrý maqsatynda qazirgi zamanǵy ájethanalar men polısıa pýnktterin, beınebaqylaý kameralaryn qoıý kózdelip otyr.
«Qala turǵyndaryna, qala qonaqtaryna, jaıaý júrginshilerge, sportpen aınalysatyndarǵa, qarıalarǵa yńǵaıly qylyp jasaldy. 50-den asa úı bar. Olardyń árqaısymen derbes jumys istep, árqaısynyń óz shekarasyn, aýmaǵyn ózine yńǵaılap, yǵystyrdyq ta, halyqqa yńǵaıly qylyp, osy jerdi daıyndap otyrmyz», – dedi Medeý aýdanynyń ákimi Áset Masabaev.
Qalalyq jasyl ekonomıka basqarmasynyń málimdeýinshe, bul jobaǵa búdjetten 4,2 mıllıard teńge qarjy bólinipti. Negizi, sharýa bıyl jyldyń sońyna deıin aıaqtalady dep josparlanǵan. Alaıda, merdigerlerdiń kepildemesimen tolyq qoldanysqa 2022 jyly kóktemde berilmek. Aldaǵy ýaqytta ıgi bastama jalǵasyn taýyp, Esentaı jaǵalaýyn abattandyrý Medeýge deıin taǵy sozylmaq. Osylaısha, almatylyqtar men sportsúıer qaýym úshin qaladan taýǵa deıin yńǵaıly jaǵdaıda jaıaý serýendeýine múmkindik jasalady.