Olardyń kinási – júrgizýshi quramnyń kólik tártibine tıisti baqylaýdy qamtamasyz etpegeni.
Almatyda eki avtoparktiń basshylary jaýapqa tartyldy, dep habarlaıdy Almaty-akshamy.kz Polisia.kz-ke silteme jasap.
Qalalyq ákimshilik polısıanyń málimetinshe, júrgizýshi quramnyń kólik tártibine tıisti baqylaýdy qamtamasyz etpegeni úshin avtokásiporynnyń 4 laýazymdy tulǵasy, onyń ekeýi – birinshi basshylar, ákimshilik jaýapkershilikke tartyldy.
«Jalpy, jyl basynan beri avtobýs júrgizýshilerine qatysty túrli jol erejesin buzǵany úshin 250-den astam ákimshilik hattamalar toltyrylyp, 5 avtobýs mamandandyrylǵan kólik turaǵyna ornalastyryldy. Jolaýshylar tasymalymen aınalysatyn qalalyq kólik kásiporyndary sanynyń aıtarlyqtaı azaıǵanyna qaramastan, keıbir basshylar jol qaýipsizdigin qamtamasyz etý boıynsha tıisti sharalardy qoldanbaýda. Olar áli de kólik qozǵalysynyń qarqyndylyǵy jaǵdaıynda kólik júrgizýge beıimdelmegen, tótenshe jaǵdaılar týǵyzatyn, aýyr zardaptarǵa ákep soqtyratyn jol-kólik oqıǵalaryn jasaıtyn elimizdiń basqa óńirleriniń turǵyndaryn jumysqa alady», – dedi Almaty qalalyq PD ákimshilik polısıa basqarmasynyń bastyǵy Nurlan Amanbek.
Jolaýshylar tasymalymen aınalysatyn kásiporyndardyń qyzmetin baqylaý jáne qoǵamdyq kólik júrgizýshileri arasynda aldyn alý sharalaryn júrgizý jalǵasatyn bolady.