Almatydaǵy botanıkalyq baqta jyldar boıy baptap kelgen, sırek kezdesetin, júz túrli tropıkalyq ósimdik bıyl qysta úsip qaldy. Sebebi, jylyjaıdyń kúrdeli jóndeý jumystary aıaqtalmaǵan. Eki jyl buryn bastalǵan nysannyń qurylysy bıyl da toqtap tur.
Bıyl oranjereıa 20 gradýs aıazda ashyq qalǵan, dep habarlaıdy Almaty-akshamy.kz.
Mamandar tropıkalyq ósimdikter mundaı temperatýraǵa beıimdelmegenin aıtady. Olar byltyr alty aı qysta tek qańqasy turǵyzylyp, jan-jaǵy qańyrap qalǵan jylyjaıdy kún saıyn ózderi jylytyp, ósimdikterdi saqtap qalýǵa tyrystyq, deıdi.
Sholpan Múrsalımova, Tropıkalyq jáne sýbtropıkalyq ósimdikter zerthanasynyń meńgerýshisi:
Oranjereıa qurylysy bastalǵan kezde bizdiń koleksıamyzda 500-den astam ósimdik túri bolǵan. Qazir 100-den astamy úsip qaldy. Olardyń ishinde 60-80 jyldyq ósimdikter de bar. Endi olardy qalpyna keltire almaımyz. Keıbireýleriniń tuqymy koleksıalyq qorda bar. Al jerde turǵan ósimdikter aman qaldy, bıik óskenderi sýyqqa shydamady.
Nysandy qaıta jóndeý jumystary «SHAK» kompanıasyna berilgen. Tólqujatqa sáıkes, qurylys 2022 jyly bastalyp, bir jyldan soń aıaqtalýy kerek edi.
Gúlnar Sıtpaeva, «Botanıka jáne fıtoıntrodýksıa ınstıtýty» rmk bas dırektory:
Oranjereıany jóndeý jumystaryna 1 mlrd 43 mln teńge bólindi, onyń 500 mln-ǵa jýyǵy ıgerildi, qalǵany búdjette qaldy. Qurylys kompanıasy jylyjaıdy ýaqytynda tapsyrmaǵan soń, biz sotqa berdik. Sot sheshimi boıynsha olarǵa nysannyń jumysyn aıaqtaý mindetteldi.
Al «Shak» merdiger kompanıasynyń ókilderi «qurylys materıaldary qymbat, al bólingen qarjy jumysty tolyqtaı aıaqtaýǵa jetpeıdi» dep qysqa qaıyrdy.
Vladımır Kopylov, «Shak» qurylys kompanıasynyń ókili:
Búdjetten bólingen qarjy az. Biz qaıta jobalyq smeta jasap jiberdik, alaıda, aqsha qarastyrylmaıtynyn aıtty.Biz ınvestor tartýǵa barynsha tyrystyq. Alaıda «Shak» kompanıasy qara tizimde tur.
Al botanıkalyq baqtyń zańgeri, eger merdigerdi qaıta tańdaıtyn bolsaq, bul proses uzaq ýaqytty alýy múmkin, deıdi.
Erik Toıjanov, «Botanıka jáne fıtoıntrodýksıa ınstıtýty» RMK zańgeri:
Endigi jumystar, demeýshi tabylsa, sol óz aqshasyna myna obektini aıaqtap berse, basqa qurylys kompanıasyn jaldap, biz memleket arqyly alsaq. Birinshiden kóp ýaqyt ketedi, ekinshiden bizdiń smetalyq qujattamamyz 3 jyl ótip ketti, ony qaıtadan biz jasaýymyz kerek, qaıtadan ekspertızadan ótkizýimiz kerek.
Tamyz aıyna deıin demeýshi kompanıa tabylsa, jylyjaıdyń qurylys jumysy bastalady. Biraq joba óte kúrdeli, tájirıbeli mamandardy qajet etedi, sondaı-aq, taǵy qansha jylǵa sozylary belgisiz. Al mundaǵy sırek kezdesetin ósimdikterdiń aldaǵy qystan aman shyǵaryna eshkim kepil bermeıdi.