Almaty qalasy boıynsha QAJ departamentiniń №11 mekemesinde 1 jeltoqsan – Dúnıejúzilik JITS-ke qarsy kúres kúnine oraı atalǵan ınfeksıanyń taralý joldary men odan qalaı saqtaný týraly dáris ótti.
Mańyzdy is-sharaǵa «Otbasylyq dáriger» qoǵamdyq qorynyń jetekshisi Jibek Ámenova, «Qamqorlyq TN-2018» qoǵamdyq qorynyń jetekshisi Madıar Ábdilov, «Revansh» qorynyń jetekshisi Elena Belokon, Qazaqstan Restoratorlar klýby qaýymdastyǵynyń basshysy Gúlnar Nurǵanatqyzy, «Evropolıs» meıramhanasynyń ókili Marat Janbolat, Dúngen respýblıkalyq etnomádenı ortalyǵy tóraǵasynyń orynbasary, Almaty qalasy Dúngen mádenı ortalyǵy analar keńesiniń tóraǵasy Rımma Masyrova qatysty.
«Spıkerler atalǵan aýrýdyń taralýyna sebep bolatyn nashaqorlyq jaıynda aıtyp, qan arqyly beriletin ınfeksıalyq kesel týraly dáris oqyp, atalǵan taqyryp boıynsha sottalǵan jasóspirimderge tolyq aqparat berdi. Maqsat, árıne, jastardy qorǵaý. Biz úshin barlyq balanyń amandyǵy, densaýlyǵynyń jaqsy bolýy mańyzdy», – deıdi epıdemıolog-dáriger Seıilhan Talasbaev.
Al óz kezeginde kolonıada jazasyn ótep jatqan jasópirimder JITS taqyrybyna arnap daıyndaǵan qabyrǵa gazetterin qorǵap, ondaǵy ózderi salǵan sýretterdiń mazmunyn, kóterer júgin jan-jaqty túsindirip berdi.
İs-shara sońynda kelgen qonaqtar sýret baıqaýynda jeńimpaz bolǵan úsh jasóspirimdi marapattady, syılyq usyndy. Al meıramhana ókili dastarhanǵa balalarǵa dep arnaıy kótere kelgen pıssa, jemis-jıdek, tátti sýsyndaryn qoıdy. Jastar meımandarǵa rahmetin aıtty.