Almaty qalasynda jol qaýipsizdigin arttyrýǵa baǵyttalǵan respýblıkalyq "Qaýipti júrgizýshi" jedel-profılaktıkalyq is-sharasy ótkizilip jatyr, - dep habarlaıdy Aqshamnews.kz.
Aldyn alý sharalarynyń negizgi maqsaty – jol qozǵalysy erejeleriniń saqtalýyn baqylaýdy kúsheıtý jáne jol-kólik oqıǵalarynyń aldyn alý. Onyń barysynda jol qozǵalysyna tikeleı qaýip tóndiretin óreskel quqyq buzýshylyqtardy anyqtaý men jolyn kesýge erekshe nazar aýdarylady.
- Jol qaýipsizdigi máseleleri – bizdiń basty basymdyqtarymyzdyń biri. Patrúldik ekıpajdar kúsheıtilgen tártipte qyzmet atqarýda. Avarıalyq jaǵdaılarǵa tikeleı áser etetin óreskel buzýshylyqtar boıynsha baqylaý aıtarlyqtaı kúsheıtildi, – dep atap ótti Almaty qalasy PD ákimshilik polısıa basqarmasy bastyǵynyń orynbasary Tımýr Serikuly.
Sońǵy táýlikte polısıa qyzmetkerleri mas kúıinde kólik basqarýdyń alty faktisin, memlekettik nómirsiz júrgen 12 júrgizýshini, sondaı-aq jalǵan nómir qoıylǵan eki kólikti jáne ózge de birqatar óreskel quqyq buzýshylyqty anyqtady. Profılaktıkalyq jumystar jalǵasýda. Polısıa qala turǵyndary men qonaqtaryn jol qozǵalysy erejelerin qatań saqtaýǵa shaqyrady.