Aýrýdyń aldyn alý óte mańyzdy.
Almaty qalasy Medeý aýdany «Amanqul ata» meshitiniń bas ımamy Serikhan Ahmadıev medısınaǵa degen senim ıslamnyń negizgi ilimderiniń biri ekenin aıtty. Ol - densaýlyqqa nemquraıly qaraıtyndarǵa qarsylyq bildiretin din qyzmetkerleriniń biri, dep habarlaıdy Almaty-akshamy.kz.
Serikhan Ahmadıevtiń aıtýynsha, búgingi kún búkil álem úshin ońaı emes ekenin, densaýlyq pen ómirdi saqtaý máselelerinde senýshilerdi parasattylyqqa, ǵylymı zertteýlerdi basshylyqqa alýǵa shaqyrady.
«Aýrýdyń aldyn alý óte mańyzdy, ásirese, juqpaly aýrýlar taraǵan ýaqytta barynsha tıimdi sharalar jasalýy mindet. Islam qaıratkerleri juqpaly aýrýlar taraǵan kezde halyqty saqtap qalý úshin utymdy ári batyl qadamdarǵa barǵany barshamyzǵa málim. Sharıǵatymyzda adam ómiriniń qundylyǵyna amanat retinde qaraý birneshe ret aıtylǵan. Osy qıyn ýaqytta vaksına arqyly aýrýdyń aldyn alý - tıimdi joldardyń biri», – deıdi Medeý aýdany «Amanqul ata» meshitiniń bas ımamy Serikhan Ahmadıev.
Aıta ketsek, ıslam dininde: «Ol qorqatyn aýrýdyń aldyn alý úshin dári qabyldaýda eshqandaı másele joq», – delingen. Sondaı-aq qalada nemese kez kelgen basqa jerde epıdemıa (aýrý) týraly alańdaýshylyq bolsa, onda oǵan qarsy vaksına jasaý tıimdi ekenin medısına mamandary aıtýda. Bul - adamnyń basyna túsken aýrýdy emdeý joly.
Sharıǵat boıynsha zárý jaǵdaıda ekpe salýǵa bolady. Alaıda ekpe saldyrý - ár azamattyń óz erki ekenin ǵalymdarymyz málimdeýde.
Qazaqstan musylmandary dinı basqarmasy da koronavırýs ınfeksıasynyń taralýyn toqtatý úshin vaksınadan ótýge shaqyrdy.