Bazar quryltaıshysy 21 sáýirde aýysqan.
"Bul jer paıdakúnemder úshin naǵyz maı shelpekke aınaldy". Prezıdent dál osylaı dep sıpattaǵan «Altyn orda» bazarynda taǵy shý shyqty, dep habarlaıdy Almaty-akshamy.kz Almaty.tv silteme jasap.
800-deı kásipker qarajat quıǵan saýda orny áli ashylmaǵan. Odan bólek, bazar ákimshiliginiń aıaq asty aýysqany máseleni odan ári ýshyqtyrǵan kórinedi. «Jańa nysan ashylǵansha taýarmen ary-beri kóship, berekemiz ketti» degen kásipkerler qurylysy bitpegen saýda kesheninen oryn satyp alǵan. Olardyń aıtýynsha, bazardyń jańa ákimshiligi aýmaǵy 30 myń sharshy metr bolatyn nysan saýdagerlerge berilmeıdi.
«Amalsyzdan bar aqshamyzdy jınap, osy jerden 12 myń dollardan 2 oryn aldym. 20 myń dollardy qolma-qol berdim, qalǵan 4 myńyn bólip tóleýim kerek edi», – dedi saýdager Gúlbaný Tatybaeva.
Eki qabatty saýda ortalyǵynyń qurylysy 2 jyl buryn bastalǵan. Al oǵan saýdagerler birigip jınaǵan 4 mıllıard teńge jumsalǵan.
«Bas prokýratýra tarapynan bizde 2 aı tekserý boldy. Soǵan baılanysty jumystyń rejımi shegerildi. Osy mamyrda bitý kerek bolǵan, biraq osyndaı sebeptermen qurylys jumysy toqtap qaldy», – dedi «Altyn orda» bazary burynǵy ákimshiliginiń ókili Dáýletjan Dımenbaev.
Bazardyń burynǵy ákimshilik ókiliniń sózinshe, quryltaıshy 21 sáýirde aýysqan. Al bazardyń jańa basshylyǵy qurylys jumysynyń 90 paıyzǵa deıin aıaqtalǵanyn alǵa tartyp, saýda kesheniniń jumysy jýyrda bastalatynyn aıtty. Kásipkerlerge oryn berilmeıdi degen sybysty joqqa shyǵardy.
«Bul - provokasıa. Ondaı nárse bolmaıdy. Bul jerde halyqtyń esh kinási joq. Halyq tirshilik etem dep saýda ornyn aldy, biz beremiz. 1,5 aıda aıaqtap, keshendi ashamyz», – dedi «Altyn orda» bazary ákimshiliginiń basshysy Ermek Marqabaev.
Prezıdent Qasym-Jomart Toqaev «Altyn Orda» bazarynyń máselesine toqtalyp, tártip ornatýdy tapsyrǵan bolatyn.