Almaty ákimi Erbolat Dosaev jumys sapary barysynda «14 aýmaq» sh/a turǵyndarymen kezdesti. 7 jyldan beri osy shaǵyn aýdanda aıaqtalmalmaı kele jatqan ınjenerlik jelilerge qatysty másele qozǵaldy, dep habarlaıdy almaty-akshamy.kz
«Biz jeti jyl boıy qatty qınalyp keldik», - dep qynjyldy jergilikti turǵyndar.
«Byltyr meniń alǵashqy jumys saparym sizderden bastaldy», - dep eske saldy qala ákimi. Erbolat Dosaev Almaty ákimi laýazymyna taǵaıyndalǵannan keıin alǵash ret osy shaǵyn aýdanǵa at basyn burǵan edi. «14-shi aýmaq» shaǵyn aýdan turǵyndary qala basshysyna alǵysyn bildirip, onyń tapsyrmasy boıynsha olardyń ınjenerlik jelilerge qatysty máseleleri sheshile bastaǵanyn atap ótti.
«Injenerlik jelilerdi salýǵa baılanysty jumysty jedeldetemiz, jyly kún raıy jol jabyny boıynsha jumystardy aıaqtaýǵa múmkindik beredi. Eń bastysy, biz bárin 30 qarashaǵa deıin aıaqtaımyz dep úmittenemiz. Aýdan ákimdigi trotýarlar boıynsha maǵan sizdermen keńesip otyrǵandaryn aıtty. Keıde barlyq jumys aıaqtalǵan kezde turǵyndar túzetýdi suraıdy. Abattandyrý aıasynda atalǵan ókilettikter aýdan ákimderine berildi, biz olardyń búdjetin kóbeıttik. Olar qazirdiń ózinde sheshim qabyldaýda. Men qadaǵalaımyn», - dedi Almaty ákimi.
«Aýdan ákimdiginiń qyzmetkerleri bizdiń ótinishterimizdi estip, jaýap beredi», - dedi «14-shi aýmaq» sh/a turǵyndary. Olar kóshe jaryǵy máselesin tezdetip sheshýdi surady.
Erbolat Dosaev Almaty ákimdigi jeke serikteske qatysty sotta jeńgenin aıtty. «Biz aqyry birinshi satyly sotta jeńdik. Merdiger apelásıalyq shaǵym túsirýi múmkin. Jaryqtandyrý máselesi mindetti túrde sheshiledi», - dedi. Syrtqy jaryqtandyrý jumystaryn júrgizý boıynsha qarajatqa qatysty máseleni merdigermen tikeleı kelisim-shartty aýdan ákimdigi jasaıtynyn aıtty. Bul turǵyndardyń osy másele boıynsha ótinimin iske asyrýdy jedeldetýge múmkindik beredi.
Buǵan deıin 2018 jyly Almaty ákimdigi memlekettik-jekeshelik áriptestik shartyn jasasqan «ABM-Vuilding 2007» JSHS, «Elektroremont» JSHS jáne «ABM-Project» JSHS úsh kompanıadan turatyn konsorsıým óz mindettemelerin saqtamaǵany habarlanǵan bolatyn. Sondyqtan almatylyqtar tarapynan kóshe jaryǵyna qatysty shaǵymdar kóbeıgen edi. Bıyl qazan aıynda sot qala ákimdiginiń talabyn qanaǵattandyrdy.