Áleýmettik jelide egde jastaǵy áıeldi soqqyǵa jyqqan er adam týraly vıdeo taraǵan bolatyn. Almaty qalasy Alataý aýdanynyń prokýratýrasy kúdikti ustalyp, polısıa bólimshesine jetkizilgenin málim etti, dep habarlaıdy Almaty-akshamy.kz QazAqparatqa silteme jasap.
«Alataý aýdany polısıa basqarmasynyń qyzmetkerleri arnaıy sharalar júrgizý barysynda kúdiktiniń tulǵasyn anyqtap, ony polısıa basqarmasyna jetkizdi. Qazirgi tańda atalǵan tulǵaǵa qatysty arnaıy tergeý áreketteri júrgizilýde. Onyń áreketine tıisti baǵa berilip, zańdy prosesýaldy sheshim qabyldanady», - dep habarlady Alataý aýdanynyń prokýratýrasynan.
Vedomstvo málimetinshe, 74 jastaǵy áıeldi óziniń 50 jastaǵy uly urǵan.
«Alataý aýdanynyń polısıa basqarmasy 1972 jyly týǵan S.A.V.-ǵa qatysty óziniń 1948 jyly týǵan S.N.I. anasyna asa qatygezdikpen, buzaqylyq nıetpen, qasaqana densaýlyǵyna aýyrlyǵy ortasha zıan keltirý deregi boıynsha tergeý júrgizip jatyr. Qazirgi tańda jábirlenýshige qatysty sot-medısınalyq saraptama taǵaıyndaldy. Qylmysty tergeý barysy prokýrordyń jeke baqylaýynda», - dedi prokýratýrada.
Buǵan deıin habarlaǵanymyzdaı, syrtqy beınebaqylaý kamerasyna jazylǵan vıdeoda aldymen eki áıel arasynda janjal shyqqanyn, keıin er adam olardyń birin jerge jyǵyp, ura bastaǵanyn kórýge bolady.