Almaty qalasynda kóshi-qon zańnamasyn buzý faktilerin anyqtaý jáne aldyn alý maqsatynda kóshi-qon qyzmeti júıeli túrde reıdtik is-sharalar ótkizýde.
Ótken táýlikte Túrksib aýdanyndaǵy qurylys nysandarynyń birinde júrgizilgen tekserý barysynda elimizde zańsyz eńbek qyzmetimen aınalysyp júrgen 22 shetel azamaty anyqtaldy, dep habarlaıdy aqshamnews.kz Polisia.kz-ke silteme jasap.
Olardyń 9-yna tıisti ruqsatsyz nemese vıza men qujatta kórsetilgen maqsatyna sáıkes kelmeıtin jumys atqarǵany úshin ákimshilik hattamalar toltyryldy. Al qalǵan 13 sheteldikke profılaktıkalyq sıpattaǵy sharalar qoldanylyp, barlyǵy Almaty qalasy Polısıa departamentiniń qabyldaý-taratý ornyna ornalastyryldy. Qazirgi tańda zań talaptaryn buza otyryp sheteldik jumys kúshin paıdalanǵan jumys berýshilerdi jaýapkershilikke tartý boıynsha tıisti sharalar qabyldanyp jatyr. Osyǵan uqsas tekserý Alataý aýdanynda da júrgizilip, ǵımarattardy jóndeýmen aınalysyp júrgen taǵy 9 sheteldik azamat anyqtaldy. Sonymen qatar Naýryzbaı aýdanynda josparly is-sharalar aıasynda sheteldikterdiń ýaqytsha jáne turaqty mekenjaılary, sondaı-aq qurylys nysandary tekserildi. Nátıjesinde jeke basyn kýálandyratyn qujatsyz júrgen 10 azamat anyqtalyp, tıisti rásimdeý jumystary júrgizildi.
– Biz kóshi-qon zańnamasyn buzýǵa qatysty derekterdi anyqtaý jáne aldyn alý boıynsha jumysymyzdy júıeli túrde jalǵastyryp kelemiz. Ásirese, qurylys alańdarynda tirkeýsiz turyp, ruqsatsyz eńbek etetin sheteldikterge erekshe nazar aýdaramyz. Árbir anyqtalǵan quqyq buzýshylyq boıynsha zań aıasynda naqty sharalar qabyldanady. Bizdiń negizgi maqsatymyz – qalamyzdaǵy qoǵamdyq tártip pen qaýipsizdikti qamtamasyz etý, – dedi Almaty qalalyq polısıa departamenti kóshi-qon qyzmeti basqarmasynyń bastyǵy Erkin Amantaev.