424 kún úzilissiz serýen... Bir qarasań — jaı ǵana sandar. Kúnde estip júrgen, úırenshikti statısıka sekildi kórinýi múmkin. Biraq shyn máninde, 424 kún boıy toqtaýsyz taýǵa shyǵý — jaı ǵana ádet emes, bul temirdeı tártipti, myqty erik-jigerdi, rýhanı tózimdilikti talap etetin naǵyz erlik. Almatylyq azamat - Aıjan Araljan osyny dáleldedi. Ol kún saıyn "ózimen kúresip", bıikke qaraı adymdaýdy úlken úrdiske aınaldyrǵan. Aqshamnews.kz tilshisi erekshe ádet qalyptastyrǵan almatylyqpen tildesip, áńgimesin tyńdady.
sýret: Ernar Almabek
Aıjan Araljan - Shyńjań provınsıasy, Kúnges aýdanynyń týmasy. Astana qalasyndaǵy "Shabyt" óner ýnıversıtetiniń túlegi. Negizgi mamandyǵy - ánshi. "Taýǵa degen mahabbat - qanymda bar" degen ol, ónerin qarjylandyramyn dep kásip qýyp, Almatyǵa kóship keledi. Aıjan 2024 jyldyń 15 naýryzynda kúnde taýǵa shyǵý týraly sheshim qabyldaǵan. Sol kúnnen beri toqtamaı taýǵa shyǵyp júr. Búgin onyń toqtaýsyz serýeniniń 424-kúni.
"Taýǵa degen qushtarlyq meniń qanymda bar"
Aıjan Araljan taýǵa shyǵý ádeti qalaı qalyptasqany jaıly áńgimelep berdi. Onyń sózinshe taýǵa degen mahabbat bala kezden qalyptasqan.
«Taýǵa degen qushtarlyq qanda bar dúnıe. Kishkentaıymnan-aq tabıǵatpen etene aralastym. Taýdyń taza aýasy, keńdigi – meniń tynysymdaı bolatyn. Astanada oqyp júrgen kezimde taýdy qatty saǵynatynmyn. Saǵynysh jınala kele, bir kúni jolym Almatyǵa tústi. Bul qalaǵa kóship kelip, úılendim. Biraq anda-sanda taýǵa shyǵý men úshin jetkiliksiz boldy. 2024 jyldyń naýryzynda ózime ýáde berdim – kúnde taýǵa shyǵamyn dep. Sodan beri, bir kún de qaldyrmaı, sol ýádemniń údesinen shyǵyp kelemin. Solaısha 424 kúndi eńserip tastappyz» deıdi ol.
sýret: Ernar Almabek
Aıjannyń bir tańy qalaı atady?
Oıana sala taýdy ańsap oıanatyn Aıjannyń bir tańy erte bastalady. Jaı ǵana erte emes, tańǵy 3-te oıanǵan ol erte uıqyǵa jatý men erte oıanýdyń mańyzy jaıly aıtty.
«Tańǵy 3-te oıanyp, taýǵa qaraı jol tartamyn. Erte turý úshin mindetti túrde erte jatý kerek. Keshki 8:30-da uıqyǵa ketemin. 3-te oıatqyshsyz-aq ózim oıanam. Jýynyp, Medeýge bet alamyn. 4:30-da jetip, 832 baspaldaqpen kóterilip, 5-ke taman taýdyń tóbesine jetemin. Jattyǵý jasap, ózenniń muzdaı sýyna túsemin. Bul – men úshin eń sergek, eń qýatty, eń tynysh ýaqyt» deıdi Aıjan myrza.
sýret: Ernar Almabek
Taý bergen tárbıe men "Ózińmen kúrestiń" qurylýy
Bir jyldan asa ýaqyt bir ádetti úzbeý - naǵyz erlik. Birinshi kezekte ózińdi jeńgenińdi dáleldeıtin is. Aıjan Araljan osy kezeńge jetýde qandaı qıyndyqtardy bastan keshti?
«Basynda óte qıyn boldy. Jańbyr, qar, daýyl – bárin ótkerdim. Tańerteń qatty aýyryp, tura almaıtyndaı kúıde bolǵan kezderim de boldy. Biraq toqtamadym. Taý meni turaqtylyqqa, myqtylyqqa tárbıeledi. 104 kún boıy eshkimsiz, jalǵyz shyǵyp júrdim. 105-kúni taýda kórisken tanystar qataryma qosylyp, birge shyǵa bastadyq. Keıin osy ádetti qoldaıtyndar kóbeıip, 40-qa jýyq adam jınaldyq. Biz «Ózińmen kúres» degen atpen kúnde taýǵa shyǵatyn top qurdyq» deıdi Aıjan Araljan.
"Úlken maqsat úshin minez kerek"
Aıjan myrzanyń aıtýynsha, adam minezdi tek qalyptastyryp qoımaı, boıyna sińirý úshin úsh kezeńnen ótýi kerek.
«Men jaı adam bolmaýym kerek, jeńilmeýim kerek, ózimmen kúresýim kerek" degen sózder meniń ómirlik ustanymyma aınaldy. Ýaqyt óte maqsatym – minezge, al minezim – tártipke aınaldy. Adamda uly maqsat bolsa, tańerteń ony oıatatyn – oıatqysh emes, sol maqsattyń ózi. Bir ádetti qalyptastyrý úshin úsh kezeńnen ótý kerek: 21 kún – bastaý, 44 kún – senim, 66 kún – ómir salty. Osyny ótkesin bári jeńildeıdi» deıdi ol.
Uly maqsatqa aınalǵan úrdis
Aıjan Araljan kúnde sýyq sýǵa túsýdiń paıdasyn bólisti. Ol bul ádettiń jumys ónimdiligin arttyýrýǵa úlken úlesi bar ekenin aıtty.
«Sýyq sý – men úshin qýat kózi. Imýnıtetti kúsheıtedi, qan aınalymyn jaqsartady, stressti basady. Qysta da, jazda da osy ádetimdi toqtatpaı kelemin. Sýdan shyqqan keıin adam 100 paıyz energıaǵa tolady. Adam mundaı energıany sezine turyp qalaı jalyǵady? Kúnde jalyqpaısyń ba deıtinderge osyny jetkizgim keledi" deıdi ol.
Aıjan myrza, áýelde ózi úshin, óziniń erik-jigerimen kúres úshin bastalǵan ádeti búginde kópke úlgi bolatyn iske aınalýy jaıly áńgimelep berdi. Onyń sózinshe, taýǵa degen mahabbattan bastalǵan úrdisti qazir kóp jastar qaıtalap júr. Bul - onyń eń basty qalaýy edi.
"Bastapqyda bul ózimmen kúresý bolsa, 100 kúnnen keıin bul ádetti jastar da úırense eken degen armanǵa aınaldy. Blog júrgizip bastadym. İshki kompleksimdi jeńip, basqalarǵa motıvasıa berýge tyrystym. Taý meni ózgertti. Psıhologıalyq kúıim jaqsardy. Endi tilegim – qazaq jastary osy paıdaly daǵdyny úırense eken. Sonda árqaısymyz energıaǵa tolyp, elimiz de alǵa basady" deıdi Aıjan myrza.