Almatyda taǵy bir zańsyz saýda nysany súrildi: Qonaev jáne Iassaýı kósheleriniń qıylysyndaǵy býrger satatyn dúńgirshek buzyldy, dep habarlaıdy aqshamnews.kz
Almatyda zańsyz stasıonarlyq emes saýda nysandaryn (SESN) jappaı súrý jumystary jalǵasyp otyr. Kezekti buzylǵan nysan – Naýryzbaı aýdanyndaǵy Qonaev jáne Iassaýı kósheleriniń qıylysynda ornalasqan býrger daıyndaıtyn dúńgirshek.
Bul súrý jumystary Almaty qalasy ákimi Erbolat Dosaevtyń tapsyrmasymen qala ákimdigi bastaǵan zańsyz ornatylǵan SESN-dardy joıý naýqany aıasynda júrgizilip jatyr.
2025 jyldyń 4 aqpanynan bastap Kásipkerlik jáne ınvestısıalar basqarmasy Jumys tobymen birlesip kóshe saýdasy nysandaryn joıýǵa kiristi. Búgingi tańda memlekettik qor jerinde ornalasqan 300-den astam SESN buzyldy.
Bul jumys aıasynda 222 oıyn avtomaty (sılomer) alynyp tastaldy. Sondaı-aq, qalada jer telimderine ornalasqan 32 kúrdeli qurylys nysany anyqtaldy. Jumys toby olardy májbúrli túrde súrý úshin sotqa talap-aryz joldady.
Almatynyń Medeý aýdanynyń turǵyny Tatána Kasatkına dúńgirshekter buzylǵasyn qala keńeıip, tazaryp, jaıaý júrginshilerge arnalǵan oryn kóbeıgenin aıtady.
«Dostyq dańǵyly boıyndaǵy, sonyń ishinde «Dostyq Plaza» saýda ortalyǵy men «Orbıtadaǵy» dúńgirshekterdi alyp tastaǵanyna óte qýanyshtymyz. Buryn fastfýd tutynýshylarynan qalǵan qoqys úıindileri, aryqtaǵy egeýquıryqtar jıi baıqalatyn. Bizdiń halyqqa tamaqtaný mádenıeti men tazalyqty saqtaýdy úırený kerek, sebebi tamaqtanyp bolǵan soń qaldyqtaryn jerge, asfáltqa tastaı salady. Dúńgirshekterdiń mańyndaǵy qoqys jáshikteri jıi tolyp turatyn. Onyń ústine, fastfýd densaýlyqqa zıan ǵoı. Osyndaı oryndardaǵy qyzmetkerlerdiń tazalyǵy men tamaq daıyndaý sanıtarlyq normalary da kúmán týdyrady. Medeý aýdany týrıser jıi keletin oryn bolǵandyqtan, qalanyń jalpy kelbeti mańyzdy. Kóktemge deıin qalamyz tazaryp, ádemi jáne jaıly bolsa eken», – dedi T.Kasatkına.
Qalǵan 210 SESN-di buzý jumystary 15 naýryzǵa deıin aıaqtalady. Komýnaldyq qyzmet bul nysandarǵa zańsyz qosylǵan ınjenerlik jelilerdi ajyratyp jatyr.