Zańsyz eńbek etip júrgen mıgranttar anyqtaldy
Almaty qalalyq polısıa departamentiniń málimetine sáıkes, Qazaqstan Respýblıkasynyń kóshi-qon zańnamasyn buzǵany úshin sot sheshimimen elden Tájikstannyń 37 azamaty qýyldy, dep habarlaıdy Almaty-akshamy.kz
«Qazaqstandaǵy Tájikstan Respýblıkasynyń konsýldyǵynyń kómegimen Almaty polısıa departamenti quqyq buzýshy sheteldikterdi Ózbekstanmen memlekettik shekaraǵa deıin jetkizýdi uıymdastyrdy. Bul úshin kóp oryndyǵy bar avtobýs bólindi. Konsýldyq keıbir adamdarǵa Otanyna oralý týraly kýálik bergen bolatyn. Bul bizdiń birinshi tájirıbemiz emes, osydan úsh aı buryn dıplomatıalyq qyzmettermen birlesip, Ózbekstan Respýblıkasynyń 20-dan astam azamatyn Otanyna jetkizý uıymdastyrylǵan», – dedi Almaty qalalyq PD kóshi-qon qyzmeti basqarmasynyń bastyǵy Asqat Býtýnchınov.
Almatyda osy kúnderi zańsyz kóshi-qon arnalaryn, sheteldikterdi zańsyz jumysqa ornalastyrý faktilerin anyqtaý maqsatynda «Kelimsek» jedel aldyn alý sharasy ótip jatyr.
«İs-sharanyń toǵyz kúninde kóshi-qon zańnamasyn buzǵany úshin 1 146 sheteldik ákimshilik jaýapqa tartyldy. 47 shetel azamaty elden shyǵaryldy. Sheteldikterdiń Qazaqstanda bolýynyń zańdylyǵyn qamtamasyz etý sharalaryn qoldanbaǵany úshin 355 tulǵa jazalandy. Sheteldik jumys kúshin tartý erejelerin buzǵany úshin 28 jumys berýshige aıyppul salyndy», – dep qorytyndylady Asqat Býtýnchınov.