Almatyda TMD, Baltyq jáne Grýzıa elderiniń V Jastar teatr forýmy bastaldy.
Oǵan Ázerbaıjan, Armenıa, Belarýs, Qazaqstan, Qyrǵyzstan, Moldova, Reseı, Tájikstan jáne Ózbekstannan kelgen eki júzden astam rejıser, dramatýrg, akter, senograf pen teatr synshylary qatysýda, dep habarlaıdy Almaty-akshamy.kz Mádenıet jáne aqparat mınıstrliginiń baspasóz qyzmetine silteme jasap.
Atalmysh joba – jas teatr qatysýshylarynyń aýqymy men birlestigi jaǵynan Dostas elderdiń mádenıet salasyndaǵy biregeı forýmy. TMD elderiniń mádenıet jáne óner salasyndaǵy baılanystardy saqtaýǵa jáne damytýǵa yqpal etedi.
Forým trıennale formatynda – úsh jylda bir ret ótedi. 2012 jyly ol Kıshınevte (Moldova), 2015 jyly Mınskide (Belarýs), 2018 jyly Erevanda (Armenıa), 2021 jyly Tashkentte (Ózbekstan) ótti. Ár forýmǵa TMD, Baltyq jáne Grýzıa elderinen qatysýshylar keledi. 12 jyl ishinde oǵan myńnan astam adam qatysyp, 20000-nan asa kórermen tamashalady.
Almatyda ótip jatqan is-shara uzaq shyǵarmashylyq prosestiń sharyqtaý shegi desek te bolady. Halyqaralyq sarapshylar kezeń-kezeńimen úzdik spektáklderdi tańdap, forýmǵa qatysý úshin sýretshiler men dramatýrgterdi konkýrstyq irikteýden ótkizdi.
Onyń basty maqsaty – TMD elderiniń shyǵarmashyl jastardyń yntymaqtastyǵyna yqpal ete otyryp, jas teatr kóshbasshylaryn anyqtap, olardy biriktirýge arnalǵan.
Forým aıasynda irikteýden ótken spektáklder kórsetiledi, sýretshiler katalogtary men jas dramatýrgterdiń pesalar jınaǵy usynylyp, dárister, semınarlar uıymdastyrylady.
Forýmdaǵy úzdik spektákl 2025 jyldyń mamyr-shilde aılary aralyǵynda Máskeýde ótetin A.P. Chehov atyndaǵy XVII Halyqaralyq teatr festıvaliniń qatysýshysy atanady.
Bilim berý baǵdarlamasy aıasynda sheteldik rejıserler men dramatýrgterdiń, kásibı teatr mamandarynyń sheberlik synyptaryn ótkizý josparlanǵan.