V Dúnıejúzilik kóshpendiler oıyndarynyń bastalýyna 11 kún qaldy.
Bıylǵy oıyndarǵa Almatydan eki sportshy qatysady. Bul týraly Óńirlik komýnıkasıalar qyzmetiniń brıfıńinde belgili boldy, dep habarlaıdy aqshamnews.kz.
Ulttyq jáne at sporty klýbynyń jetekshisi Nurlan Ospanovtyń aıtýynsha, ár óńirden oıyndarǵa qatysatyn «elshiler» men bir «batyr» sportshy taǵaıyndalady. Olardyń mindeti – oıyndardyń mańyzdylyǵy men erekshelikterin nasıhattaý, sondaı-aq kezdesýler men dóńgelek ústelderdi uıymdastyrý.
«QR Týrızm jáne sport mınıstrliginiń janynan 5 Dúnıejúzilik kóshpendiler oıyndaryna arnalǵan dıreksıa quryldy, ol tolyǵymen uıymdastyrý máselelerimen aınalysady. Bizdiń mindetimiz – Almatyda kóshpendiler oıyndaryn nasıhattaý jáne is-sharalar barysynda Astanadaǵy oıyndarǵa qatysý. Bul týrıserge Almaty qalasyn, onyń tarıhyn, sportyn jáne ulttyq qolónerin tanystyrý úshin jasalady», – dep bólisti Nurlan Ospanov.
Almatydan eki sportshy el namysyn «qazaq kúresi» boıynsha qorǵaıdy. Olarǵa úlken úmit artylyp otyr, ásirese halyqaralyq dárejedegi sport sheberi Erasyl Janataevqa artylǵan senim mol.
Qazirgi ýaqytta Astanada oqý-jattyǵý jıyndarynyń úshinshi kezeńi ótip jatyr. Sportshylardy irikteý Qazaqstan chempıonattary men kýboktarynyń júldegerleri arasynan júrgizildi.
Daıyndyq barysynda 52 halyqaralyq jáne respýblıkalyq oqý-jattyǵý jıyndary men 40 jarys (23 halyqaralyq jáne 17 respýblıkalyq) ótkizildi.
Almaty qalasynyń koordınatorlarynyń biri, eńbek sińirgen sport qaıratkeri Aıtalap Qurǵambaev sportshylardyń jarystarǵa jaqsy daıyndyqpen keletinine senim bildirdi.
«Bul is-sharaǵa álemniń 89 elinen qatysýshylar keledi dep kútilýde. Bul elge óziniń ulttyq tarıhyn, mádenıetin jáne sportyn kórsetýge úlken múmkindik. Eger biz osy múmkindikti paıdalana alsaq, týrısik baǵyttaǵy jumysymyzdy jandandyramyz. Qazanat ıpodromynda 10 gektar alańda etnoaýyl mádenı baǵdarlamasy uıymdastyrylady. Elimizdiń árbir óńiri úsh kıiz úı tigip, ózderiniń tarıhyn, mádenıetin jáne qolónerin kórsetedi», – dep tolyqtyrdy ol.
Brıfıńke respýblıkalyq «Qusbegilik» federasıasynyń vıse-prezıdenti, «Qyran» federasıasynyń atqarýshy dırektory Baǵdat Múptekeqyzy da qatysty. Ol bul oıyndar – qazaq halqynyń biregeı ulttyq bolmysyn álemge pash etý múmkindigi ekenin atap ótti.
«Aldaǵy is-shara kóshpendiler oıyndarynyń álemdegi deńgeıin ǵana emes, Qazaqstannyń mádenı jáne sporttyq qundylyqtaryn da kórsetedi. Bizdiń ulttyq sport túrimiz – «qusbegilik» aldyńǵy tórt oıynnyń baǵdarlamasyna kirmegen edi, biraq bıyl ol engizilip otyr, biz buǵan óte qýanyshtymyz. Búrkit – qazaq rýhy men tózimdiliginiń sımvoly, ol sondaı-aq bizdiń ulttyq týymyzda beınelengen», – dep bólisti Baǵdat Múptekeqyzy.
V Dúnıejúzilik kóshpendiler oıyndary – elder arasyndaǵy mádenı jáne sporttyq baılanystardy nyǵaıtatyn, sondaı-aq ulttyq murany nasıhattaýǵa yqpal etetin mańyzdy is-shara.