Sátbaev ýnıversıtetinde Bostandyq aýdany ákimi apparatynyń uıymdastyrýymen áleýmettik qorǵaý júıesi qyzmetkerleriniń kúnine arnalǵan merekelik is-shara ótti. Onda aýdan ókilderi jınalǵan qaýymdy kásibı merekesimen quttyqtap, alǵysyn jetkizdi.
"Áleýmettik qyzmetkerler – bul únemi muqtaj jandardyń janynan tabylyp júretin, olarǵa kúndelikti, turaqty kómektesetin, jalǵyzilikti qarttarǵa, múgedektigi bar adamdarǵa, ómirlik qıyn jaǵdaıǵa tap bolǵan otbasylarǵa qoldaý kórsetetin, aýyrtpalyǵyn kóterisýden qashpaıtyn jany izgi, meıirimdi adamdar. Iá, sizder atqaryp júrgen eńbek álemdegi eń izgi jáne shydamdylyqty, kásibılikti, úlken júrekti qajet etetin sala. Osynaý adamı qundylyqtar tórinen kórinip júrgen árqaısysyńyz úshin qýanyshtymyn", – dedi Bostandyq aýdany ákiminiń mindetin atqarýshy Sáken Aralbaev.
İs-shara áleýmettik salanyń barlyq qyzmetkerine alǵys bildirýge, olardyń qoǵamnyń damýyna jáne halyqtyń ómir súrý sapasyn jaqsartýǵa qosyp júrgen ólsheýsiz eńbegin atap ótýge baǵyttalǵan.
Merekede osy salada abyroıly eńbek etip júrgen mamandar 7 nomınasıa boıynsha marapattaldy. Olardyń ishinde «Aýdannyń úzdik áleýmettik qyzmetkeri», «Aýdannyń úzdik medısınalyq-áleýmettik mekemesi», «Aýdan bólimshesiniń úzdik meńgerýshisi» syndy atalymdar bar. Jeńimpazdar anyqtalarda áleýmettik qyzmetkerler baryp qyzmet kórsetip júrgen otbasylardyń da baǵasy, yqylasy eskerildi deıdi sarapshylar.
Jalpy, Bostandyq aýdanynda 100-den astam áleýmettik qyzmetker bar. Merekede sol jandardyń arasynan oza shapqandary búgin alǵysqa, marapatqa ıe boldy. Qushaqtary gúlge, júzderi qýanyshqa toldy.
Mereıi tasyǵan jandardyń qurmetine Baqtıar Taılaqbaev, Tahmına Áshimbekova, «Aǵaıyndy» toby án-jyrdan shashý shashty.
"Men Almaty qalasy Jumyspen qamtý jáne áleýmettik baǵdarlamalar basqarmasynyń №1 bólimshesinde eńbek etemin. Osy salada júrgenime 15 jyl boldy. Qamqorlyǵymda múmkindigi shekteýli alty bala bar. Olardyń júıke júıesinde aýytqý bolǵanymen, meni tanıdy, kúnde kútedi, izdeıdi, esikten kórinsem qýanady. Ketip bara jatsam qol bulǵap qımaı qoshtasady. Sebebi men jumys kúnderi olarmen ylǵı birgemin. Baldyrǵandardyń qolyna qalam, qaǵaz ustap sýret salýyna, tamaq ishýine de kómektesemin. Olar kóńildense án de salyp, bı bıleıdi. Ata-analary jumysqa ketkende olardyń bir júgin kóterisip, solaı balalaryna qaraılasamyz. Úlkenderdiń muńyn da tyńdap, olarǵa sózimizben, júregimizdiń jylýymen qoldaý bildiremiz. Iaǵnı bizdiń mısıamyz úlken. Osy eńbegimizdiń baǵalanyp jatqanyna qýanyshtymyn. Osylaı ár otbasyna súıeý bolyp, adamgershiliktiń, qamqorlyqtyń, janashyrlyqtyń jarqyn úlgisine aınalǵan barlyq áriptesim qurmetke laıyq dep bilemin", – deıdi «Aýdannyń úzdik áleýmettik qyzmetkeri» nomınasıasynyń jeńimpazy Raýshan Qalbabaeva.