Almaty ákimi Darhan Satybaldy «Almaty Tazalyq» komýnaldyq kásipornyna baryp, qalany tazalaý jáne abattandyrý kólemin keńeıtýge baǵyttalǵan 2026 jylǵa arnalǵan josparlarmen tanysty.
Kásiporyn usynǵan jańa jobaǵa sáıkes, aldaǵy jyldan bastap Almatyda kóshe-jol jelisin jáne jasyl aımaqtardy kútip ustaý «qasbetten qasbetke deıin» qaǵıdaty boıynsha júzege asyrylmaq. Bul tásil bir uıymǵa jol tósemin, trotýarlardy, aryq júıelerin, sondaı-aq jasyl jelekter men býferlik aýmaqtardy kútip ustaý mindetin keshendi túrde júkteıdi.
Kásiporynnyń málimetinshe, 2026 jyly «Almaty Tazalyq» qyzmet kórsetetin aýmaqtyń kólemi 15 mıllıon sharshy metrden 26 mıllıon sharshy metrge deıin ulǵaımaq. Bul tizimge jalpy uzyndyǵy 1180 shaqyrym bolatyn 687 magıstraldy kóshe enedi. Qalanyń ınfraqurylymyn sapaly ustaý úshin baǵbandar, agronomdar, arborıster men dendrologtar qataryn kóbeıtý jáne 319 birlik jańa arnaıy tehnıka satyp alý josparlanǵan.
Sonymen qatar, jol-jóndeý jáne tazalyq jumystaryna arnalǵan qazirgi tarıfter 2001 jyly bazalyq baǵalar negizinde eseptelip, ınflásıa deńgeıinde ǵana túzetilip kelgeni atap ótildi. Al materıaldar men resýrstardyń quny aıtarlyqtaı ósken.
Qazirgi tańda kóshe-jol jelisi men jasyl aımaqtardy kútip ustaýǵa arnalǵan tarıfterdi jańartý jáne qaıta esepteý jumystary júrgizilip jatyr. Bul baǵyttaǵy zertteýlermen Qazaqstan jol ǵylymı-zertteý ınstıtýty aınalysyp otyr. Ákim qala qyzmetterine osy jumysty qarasha aıynyń sońyna deıin aıaqtap, máslıhattyń qaraýyna usynýdy tapsyrdy.
Darhan Satybaldy josparlanǵan jobalardy tıimdi júzege asyrýdy jáne qala ınfraqurylymyn kútip-baptaýdy qamtamasyz etýdi mindettedi.
«Bizge «qasbetten qasbetke deıin» qaǵıdatyna kóshý qajet. Qyzmet sapasyn arttyrý úshin kadr áleýetin nyǵaıtyp, zamanaýı tásilderdi engizý mańyzdy. Qala komýnaldyq kásiporyndardy qajetti tehnıkamen jáne resýrspen qamtamasyz etip otyr. Endi bastysy, senimnen shyǵyp, turǵyndarǵa joǵary deńgeıdegi qyzmet kórsetý», — dedi Almaty ákimi.
Sonymen qatar, komýnaldyq qyzmetterdiń jumysyn tıimdi basqarý men ashyqtyqty qamtamasyz etý maqsatynda Almatyda kásiporyndardyń qyzmetin naqty ýaqyt rejıminde baqylaýǵa múmkindik beretin biryńǵaı sıfrlyq platforma engiziledi. Júıe arqyly tehnıkanyń qozǵalysy, merdiger uıymdardyń jumys tıimdiligi jáne resýrstardyń bólinýi taldanady. Bolashaqta bul júıe qalanyń basqa da qyzmetine engizilip, jedel basqarý ortalyǵymen biriktiriledi.