Memleket jáne qoǵam qaıratkeri, Qazaqstan Respýblıkasy İshki ister mınıstrliginiń eńbek sińirgen qyzmetkeri, «Generaldar keńesi» Respýblıkalyq qoǵamdyq birlestigi Prezıdıýmynyń alǵashqy tóraǵasy, ádilet general-maıory Rústem Qaıdarovtyń qaıtys bolǵanyna bes jyl tolýyna oraı Almatyda eske alý sharasy uıymdastyryldy, dep habarlaıdy aqshamnews.kz.
Polisia.kz-tiń habarlaýynsha, shara marqumnyń otbasy turǵan úıdiń aýlasynda ótip, oǵan general Qaıdarovtyń týystary men jaqyndary, áriptesteri, sondaı-aq Almaty qalalyq polısıa departamentiniń basshylyǵy men jeke quramy qatysty.
– Rústem Esimhanuly qazaq polısıasynyń damýyna ólsheýsiz úles qosqan, adal qyzmeti men janqıarlyq eńbegi arqyly el qurmetine bólengen tulǵa. Ol búgingi urpaqqa erlik pen adaldyqtyń, shynaıy patrıotızmniń úlgisin kórsetken azamat. Laıyqty ofıserlerdi tárbıelep, quqyq qorǵaý salasynyń bedelin arttyrdy. General Qaıdarov qatardaǵy polıseılerdiń múddesin qorǵaýǵa erekshe kóńil bóldi. Ardagerlerge qoldaý kórsetý jolynda da zor eńbek sińirdi», – dep atap ótti «Generaldar keńesi» Respýblıkalyq qoǵamdyq birlestiginiń tóraǵasy Beksultan Sársekov.
Ádilet general-maıory Rústem Qaıdarov – qazaq polısıasynyń tarıhynda erekshe oryn alatyn kórnekti tulǵa. Ol KSRO İshki ister mınıstrliginiń úzdik qyzmetkerleriniń biri, Qazaqstan Respýblıkasy İshki ister mınıstrliginiń qurmetti ardageri, quqyqtaný jáne ekologıa salasyndaǵy tanymal ǵalym boldy. Rústem Esimhanuly Reseı jaratylystaný ǵylymdary akademıasynyń tolyq korespondent múshesi, Halyqaralyq aqparattandyrý akademıasynyń akademıgi, Halyqaralyq ekologıalyq palatanyń qurmetti profesory atandy. 20-dan astam ǵylymı maqala men oqý quraldarynyń avtory, Qazaq KSR Qylmystyq is júrgizý kodeksiniń avtorlarynyń biri boldy. Onyń eńbegi tek elimizde ǵana emes, halyqaralyq deńgeıde de joǵary baǵalandy. BUU-nyń esirtki bıznesine qarsy kúres máseleleri jónindegi komısıasynyń 39-sessıasynda Qazaqstan delegasıasynyń quramynda jumys istep, Mınsk konvensıasyn ázirleý jónindegi delegasıany basqardy. Rústem Qaıdarov Reseı Federasıasynyń «Parasat», «Dostyq juldyzy», «Eren eńbegi úshin» ordenderimen, sondaı-aq KSRO, Qazaqstan, Reseı, Ýkraına jáne Belarýstiń 30-dan astam medalimen marapattalǵan. 2019 jyldyń 27 jeltoqsanynda Almatyda bolǵan ushaq apatynda 14 adam qaza tapty. Sol qaıǵyly oqıǵadan el úshin adal qyzmet etken ádilet general-maıory Rústem Qaıdarov ta qaza boldy. General Qaıdarovtyń ómir joly men eńbegi – adaldyqtyń, patrıotızmniń jáne qaısarlyqtyń aıqyn úlgisi. Onyń esimi men eńbekteri halyq jadynda máńgi saqtalady.