Almatyda úsh jyl ishinde ondaǵan myń turǵynnyń sý jáne elektrmen qamtylý sapasy jaqsardy
Sońǵy úsh jylda Almaty qalasynyń ákimi Erbolat Dosaevtyń basshylyǵymen ınfraqurylymǵa qatysty kóptegen másele sheshimin tapty: qalada 538 shaqyrym sý qubyry jáne káriz júıeleri jańadan salynyp, qaıta jańǵyrtyldy, energetıka salasynda iri jobalar júzege asyryldy, dep habarlaıdy aqshamnews.kz
Bul jańa turǵyn alaptaryn ortalyqtandyrylǵan júıelerge qosýǵa jáne burynnan bar aýdandardaǵy, sonyń ishinde Alataý, Naýryzbaı jáne Jetisý aýdandaryndaǵy qyzmet kórsetýdiń senimdiligin arttyrýǵa múmkindik berdi.
Sonymen qatar, elektrmen jabdyqtaý salasynda da aýqymdy jobalar belsendi túrde iske asyrylyp jatyr. 2022 jyly 138 shaqyrym elektr jelileri jańǵyrtyldy. 2023 jyly qýaty 100 MVt bolatyn jańa «Almagúl» qosalqy stansıasy salyndy, ol qalanyń ońtústik bóligindegi shamamen 200 myń tutynýshyny elektr qýatymen qamtamasyz etti. Buǵan qosa, qalanyń bes aýdanynda jalpy uzyndyǵy 197,97 shaqyrym jeli qaıta jańartyldy.
2024 jyly Almaarasan, Kókshoqy, Ermensaı, Álmerek jáne Qaırat sıaqty jańa shaǵyn aýdandardy elektrmen qamtý jumystary bastaldy. Túrksib aýdanynda qýaty 80 MVt bolatyn qosalqy stansıanyń qurylysy jalǵasyp jatyr. Jalpy, 2024 jyly 223 shaqyrym áýe jáne kabeldik jeliler tartyldy, bul elektr jelileriniń tozý deńgeıin 64,5%-ǵa deıin tómendetýge jáne 200 myńnan astam tutynýshyny úzdiksiz elektrmen qamtamasyz etýge múmkindik berdi.
2025 jyly jeti jańa jobany iske asyrý josparlanǵan, onyń ishinde 110/6-10 kV kerneýli PS qosalqy stansıasy men úsh taratý qosalqy stansıasynyń qurylysy bar. Jelilerdiń jalpy uzyndyǵy 123 shaqyrym bolady, bul jelilerdiń tozýyn 63,3%-ǵa deıin azaıtyp, Medeý, Jetisý, Túrksib jáne Alataý aýdandarynda elektrmen jabdyqtaýdyń senimdiligin arttyrýǵa múmkindik beredi.
Injenerlik ınfraqurylymdy jańǵyrtý jumystary júıeli jáne kezeń-kezeńimen – Memleket basshysynyń tapsyrmalary men Almaty qalasynyń turaqty damý josparyna sáıkes júrgizilip otyr.