Almaty qalasyndaǵy jalpy joldyń uzyndyǵy 3097 shaqyrym
Aldaǵy 2 jylda Almaty qalasynda 3 jolaıyryq tolyq paıdalanýǵa beriledi. Sondaı-aq qaladaǵy 5 aýdanda 209 shaqyrym jańa jol salynady. Bul shahardaǵy jol qozǵalysyn rettep, ekologıalyq ahýaldyń jaqsarýyna sep bolmaq, dep habarlaıdy «Habar 24».
Almaty úshin túıini sheshilmegen máseleniń biri - joldaǵy keptelis. Sońǵy málimetterge súıensek qalada 500 myńnan astam kólik tirkelgen. Buǵan kún saıyn ózge oblystardan keletin mashınalardy qosyńyz. Bul túıitkildi sheshý úshin sońǵy 15 jylda 18 jolaıyryq salyndy. Munymen qosa 11 bekettik metro istep tur. Biraq shaharda áli de jol qozǵalysy qıyn.
«Halyq sany da kóbeıip jatyr. Razvázka bolmaǵan jyldarmen qazirgi jyldardy salystyrsaq, báribir keptelis bolyp jatyr. Sol sebepti halyq sany kóbeıgen soń jol máselesin de turaqty damytý kerek»,- deıdi qala turǵyny Ǵazız Erejep.
Qala ákimdiginiń tapsyrysymen qazir salynyp jatqan 3 jolaıyryq bolashaqta kólik qozǵalysyn jyldamdatady degen boljam bar. Onyń biri Buqtyrma kóshesimen Qulja tas jolynyń qıylysynda salynýda. Bul qurylysqa 11,5 mlrd teńge bólingen. Búgingi tańda jolaıryqtyń 90 paıyz jumysy aıaqtalyp, kópirleri paıdalanýǵa berildi. Tek jerasty ótkelderiniń qurylysy qalǵan.
«Ortada 1400 mm magıstraldyq trýbalar jatqandyqtan qosyp úlgermedik. Sondyqtan qaldy. Qazirgi tańda osy obekt boıynsha ınjenerlik toraptar salynýda, sý taratý qubyrlarynyń 80 paıyzy aıaqtaldy», - deıdi merdiger kompanıa ınjeneri Maqsat Baısharaev.
Almaty qalasyndaǵy jalpy joldyń uzyndyǵy 3097 shaqyrym. Olardyń 86 prosentinde asfált jabyndysy bar. Ákimdik ókilderi 2023 jyly bul kórsetkishti 95 paıyzǵa jetkizemiz deıdi. Atap aıtqanda bıyl Shańyraq-1, Álmerek, Qaırat, Aqjar, Alǵabas shaǵyn aýdandarynda jańa joldar salynyp bitedi. Sondaı-aq kólik qatynasy úshin mańyzdy Rysqulov dańǵyly bolashaqta qala shekarasyna deıin uzartylady.
«Saıyn kóshesin Rysqulov dańǵylynan Móńke bı kóshesine deıin uzartý. Onyń uzyndyǵy 3 km bolady. Búgingi kúnge jumystar 55 prosente deıin daıyn. Osy jyly biz Tóle bı kóshesin Iassaýı kóshesinen qalanyń shekarasyna deıin jumystardy bastadyq. Qurylys jumystaryn»,- deıdi Almaty qalasy jol ınfraqurylymyn damytý bóliminiń jetekshisi Aıdos Jeldikbaev.
Seıfýllın men Jansúgirov jáne Saıyn men Móńke bı kósheleriniń qıylysyndaǵy jolaıyryqtardyń qurylysyna da qomaqty qarajat bólingen. Al Úlken Almaty aınalma joly iske qosylsa júrisimiz jyldamdap, tynysymyz keńeıedi degen úmit bar.