Batareıa Dormıa kárzeńkesiniń kómegimen alyndy
Almatylyq dárigerler úsh jasar bala jutyp qoıǵan batareıany otasyz aldy, dep habarlaıdy Almaty-akshamy.kz tilshisi Almaty qalalyq qoǵamdyq densaýlyq saqtaý basqarmasyna silteme jasap.
Vedomstvonyń málimetinshe, balanyń ata-anasy Almaty qalalyq balalar jedel medısınalyq kómek kórsetý ortalyǵyna júgingen. Sábıdiń anasy balasynyń qolyndaǵy shynashaqtaı batareıany kenet aýzyna salyp, jutyp qoıǵanyn aıtqan.
«FGDS zertteýi bógde zattyń baryn kórsetti - asqazannyń tómengi jaǵynda shynashaqtaı kishkene batareıka tabyldy. Balalar jedel járdem bóliminiń dárigerleri balanyń denesinen qaýipti zatty shyǵarýdy dereý qolǵa aldy. Sebebi, batareıany jutqan soń, qabyný prosesi birneshe saǵat ishinde bastalady. Bul asqazannyń nemese óńeshtiń shyryshty qabyǵynyń kúıip ketýine, tipti osy organdardyń perforasıasyna ákelýi ábden múmkin», - dep habarlady qalalyq qoǵamdyq densaýlyq saqtaý basqarmasynda.
«Batareıany shyǵarý kezinde ol qaıta-qaıta óńeshtiń joǵarǵy úshten bir bóliginen, dál joǵarǵy fızıologıalyq tarylý aımaǵynda syrǵyp kete berdi. Sodan biz batareıany joǵarǵy úshten bir bólikke jetkizip, onyń artyna Foleı kateterin qoıýdy sheshtik. Batareıa Dormıa kárzeńkesiniń (endoskopıalyq prosedýralar kezinde qýystaǵy tastar men túrli bógde denelerdi alyp tastaýǵa arnalǵan qural) kómegimen alyndy. Sodan keıin Foleı kateteri úrlenip, endoskoptyq tútik jáne bógde deneni ustap alǵan Dormıa sebetimen birge asqazan men óńeshten sátti shyǵaryldy», - dedi Almaty balalar shuǵyl medısınalyq kómek kórsetý ortalyǵynyń hırýrg-endoskopıst dárigeri Murat Dúısebaev.
Osyǵan oraı, hırýrgıalyq ota jasaýdyń qajeti bolmaǵan.
«Jyl basynan beri balalar shuǵyl medısınalyq kómek kórsetý ortalyǵyna asqazan-ishek joldarynda bóten zat bar 125 bala, tynys joldarynda bóten zat bar 32 bala túsken. Kóbinese, balalar tıyn, batareıa, kishkentaı oıynshyqtardy jutady. Ókpeden dárigerler negizinen jerjańǵaq, tuqym, grek jańǵaǵy, qalam qaqpaǵyn tabady»,- dep habarlady vedomstvoda.
Joǵaryda atalǵan jaǵdaıǵa baılanysty dárigerler ata-analardan kishkentaı balalaryna muqıat qaraýdy, olardyń oınaıtyn zattaryna nazar aýdarýdy surady.