Almaty qalasy Naýryzbaı aýdanynyń Qorǵanys isteri jónindegi basqarmasy áskerı qyzmetshileri men Qazaqstan Qarýly Kúshteri ardagerler keńesiniń ókilderi Uly Otan soǵysynyń ardageri Leonıd Nıkıtovıch Podkolzındi 98 jasqa tolýymen saltanatty túrde quttyqtady, dep habarlaıdy aqshamnews.kz
Leonıd Nıkıtovıch 1926 jyly Novosıbırsk oblysynyń Isketınsk aýdany, Týla aýylynda dúnıege kelgen. Soǵys jyldarynda ol Belorýs maıdanynda artıllerıst retinde qyzmet etip, úlken erlik pen tózimdilik tanytty. Soǵys aıaqtalǵannan keıin serjant ataǵynda Kenıgsbergke jiberilip, onda jas sarbazdardy artılerıalyq qarýdan atý ónerine úıretti. 1952 jyly Leonıd Nıkıtovıch Almatyǵa qonys aýdaryp, beıbit ómirge atsalysty. Ol parovoz mashınısiniń kómekshisi, avtobazada júrgizýshi bolyp jumys istep, keıin qalalyq depo sheberhanasynyń meńgerýshisi boldy.
Leonıd Nıkıtovıch soǵys týraly sırek áńgimeleskendi unatady, estelikterin ózinde saqtaǵandy jón kóredi. Alaıda, ol óz oılary men sezimderin eki kitabynda bildirgen. 2009 jyly jaryq kórgen «Zovýsheı jızneı Vechnyı zov» atty birinshi kitabynda ómir týraly tereń tolǵanystary jazylǵan. 2024 jyldyń mamyr aıynda jarıalanǵan «Golos otsov» atty ekinshi kitaby patrıotızm men Otanǵa degen súıispenshilikke toly óleńder jınaǵy bolyp tabylady. Bul óleńderinde Leonıd Nıkıtovıch mahabbat, aıyrylysý, ómir jáne ólim taqyryptaryn da qozǵaıdy.
Otan aldyndaǵy erlikteri úshin Leonıd Nıkıtovıch kóptegen marapattarǵa ıe boldy, olardyń arasynda Uly Otan soǵysynyń ordeni, «Soǵys ardageri» ordeni, «Eńbek ardageri» ordeni, Georgıı Jýkov medali, «Jeńistiń 20 jyldyǵy» medali jáne basqa da mereıtoılyq medaldar bar.
Búginde Leonıd Nıkıtovıch Almaty qalasynda qyzy Lúdmıla Leonıdovnamen birge turady. Sondaı-aq, onyń uly, úsh nemeresi jáne tórt shóberesi bar, olar atalaryn maqtan tutady.