Almatynyń Arbatynda uıymdastyrylǵan Nauryz Fashion Day is-sharasynda úkili taqıa, búrmeli kóılek, oıýly qamzol kıgen kórkem qyzdar, aq kımeshekti asyl ájeler jáne bórik, shapany jarasqan er azamattar búgingi Ulttyq kıim kúnine qurmet bildirip, sán kórsetilimine qatysty.
Arbat kóshesine tóselgen qyzyl kilem ústimen belgili dızaıner Raýshan Ánýarbekovanyń «Álemdi tańqaldyrǵan qazaq ájeleri» jobasynyń qatysýshylary, ıaǵnı otandyq hám sheteldik podıýmdardy ulttyq kıimderimizben baǵyndyryp júrgen ádemi ájeler, «Qazaqstan arýy» baıqaýynyń sulý fınalısteri sán-saltanatpen júrip ótti.
Osy oraıda aıta keteıik, Nauryz Fashion Day tórine shyqqan almatylyq ájeler buryn Mılanda sán aptalyǵynyń ashylýynda óner kórsetken. Endi Nú-Iork pen Parıjdegi Fashion Week-ke qatysýdy josparlap otyr.
Ashyq aspan astynda ulttyq kıimmen jarqyrap shyqqan qatysýshylardyń qataryna qalanyń etno stılde kıingen turǵyndary da kelip qosyldy. Iá, qyzyl kilem ústimen júrip ótýge búgin Ulttyq kıim kúnine qurmetim dep, qydyrýǵa qazaqy kıimin arnaıy kıip shyqqan qarapaıym turǵyndarǵa da múmkindik berildi. Olar da ózderin bir sát juldyz sezinip, podıýmǵa kóterilip, qol bulǵap, kóptiń qoshametine bólendi.
– «Eń ádemi kıim – ultyńnyń kıimi» degen. Men buryn «Burymdy qyzdar», «Qyz syny», «Kelinder saıysy» sekildi baıqaýlardy jıi uıymdastyratynmyn. Sol kúnder eske oralyp tur. Ol tusta qamzol, kájekeı degendi tek merekelerde, álgindeı baıqaýlar úshin ǵana kıetin edik. Qazir jekelegen mekemeler qyzmetkerleriniń resmı jumys ornynda naýryz boıy kıip otyratynyn kórip júrmin. Kúndelikti ómirde de ulttyq kıim kıe bastaǵanymyzǵa qýanyshtymyn, – deıdi almatylyq zeınetker-pedagog, qoǵam belsendisi Raısa Qaldybaeva.
Qyzyl kilemmen sán-saltanaty kelisken «Alataý» dástúrli óner teatrynyń juldyzdary, Almaty mýzeıler birlestiginiń qyzmetkerleri, Almaty memlekettik qýyrshaq teatrynyń ujymy, almatylyq kitaphanashylar, Almaty haıýanattar parkiniń eńbekkerleri de júrip ótti. Sóıtip ásem Arbattyń aınalasy bekzat álemge bólendi.
Mádenı is-shara kezinde jınalǵan qaýymǵa ulttyq kıimder týraly vıktorınalyq suraqtar qoıylyp, durys jaýap bergen jeńimpazdarǵa Almaty mýzeıine tegin bılet usynyldy.