2024 jyldyń basynan bastap Almaty qalasy boıynsha Saýda jáne tutynýshylardyń quqyqtaryn qorǵaý departamenti turǵyndardyń quqyqtarynyń buzylýyna baılanysty 6000-ǵa jýyq ótinishterin qarady. Bul týraly vedomstvo qyzmetiniń qorytyndylaryna arnalǵan ÓKQ brıfıńinde belgili boldy, dep habarlaıdy aqshamnews.kz.
Ótinishterdi qaraý qorytyndysy boıynsha 40 jospardan tys tekserý júrgizildi, nátıjesinde tutynýshylarǵa 303 239 531 teńge qaıtaryldy. Departament, sonymen qatar, zań buzýshylarǵa 168 ákimshilik jaza taǵaıyndady.
Departament basshysynyń orynbasary Nurlan Ábdıev eń kóp taraǵan zań buzýshylyqtar tutynýshylardyń talaptaryna ýaqtyly jaýap bermeý, sondaı-aq áleýmettik mańyzy bar azyq-túlik taýarlaryna zańnamada belgilengen saýda ústemesin buzý bolyp tabylatynyn aıtty.
«Departament jumysynyń mańyzdy baǵyty saýda jáne tutynýshylardyń quqyqtaryn qorǵaý salasyndaǵy zańnama normalaryn saqtaý boıynsha is-sharalar keshenin júrgizý bolyp tabylady. Kelip túsetin ótinishterdiń negizgi úlesi bólshek saýda jáne elektrondyq saýda salasyna qatysty, ony departament júıeli túrde qaraıdy», - dep atap ótti N. Ábdıev.
Tutynýshylar kóbinese turmystyq qyzmet kórsetý salasynda sapasyz qyzmet alady. Departament tutynýshylarmen túsindirý jumystaryn júrgizedi, ótinishter jasaýǵa quqyqtyq kómek kórsetedi jáne odan ary sottarǵa úshinshi tulǵalar retinde qatysýdy usynady.
Sondaı-aq Departament Almaty qalasynyń qoǵamdyq uıymdarymen Almaty qalasy azamattarynyń tutynýshylardyń quqyqtaryn qorǵaý salasynda birlesken jumys júrgizýde.
«Derekterdi taldaý nátıjesi tutynýshylyq quqyqtyq mádenıettiń artýy týraly da, josyqsyz kásipkerlik qyzmettiń ósýi týraly da kórsetti. «Sapaly ónim» áleýmettik jobasy aıasynda Almaty qalasynyń qoǵamdyq uıymdary azyq - túlik qaýipsizdigi sapasynyń sáıkestigin anyqtaý úshin sheteldik óndirýshilerdiń 66-ǵa jýyq ónim ataýyn satyp alyp, tamaq ónimderin synaý zerthanasyna saraptama júrgizýge jiberildi», - dep bólisti spıker.
Nátıjesinde 24 bıznes sýbektisi ákimshilik jaýapkershilikke tartyldy.
Sondaı-aq, 2024 jyldyń 8 aıynyń qorytyndysy boıynsha baǵa belgileýge jáne tutynýshylardyń quqyqtaryn qorǵaýǵa qatysty josyqsyz qyzmet belgilendi. Bul faktiler joıyldy, nátıjesinde 396 ákimshilik hattama toltyryldy.