Jambyl fılarmonıasynda ótken án-áýen keshine QR Halyq ártisi Jánıa Áýbákirova, Túrkıa ártisi Lelá Baıramoǵullary jáne ózge de óner maıtalmandary qatysty.
Konsert bastalmaı turyp Túrkıanyń Almatydaǵy Bas konsýly Evren Múderrısoglý quttyqtaý sóz sóıledi.
"Men osyndaı tamasha mýzyka mektebine kelgenime óte qýanyshtymyn. Qazaqstan men Túrkıa arasyndaǵy tarıhı baýyrlastyq kóptegen salalarda damyp jatyr. Búgingi konsert eki el arasyndaǵy qarym-qatynasqa oń áser etedi dep senemin. Túrkitildes elderdiń yntymaqtastyǵy kóptegen salalarda, sonyń ishinde mádenıet pen ónerde de qarqyndy damyp keledi. Antalıa qalasynyń memlekettik fılarmonıasynyń solısi, belgili fleıtashy Lelá Baıramoǵullaryn tyńdaýǵa kelgenderdiń barlyǵyna alǵys aıtamyz. Jánıa Áýbákirovaǵa qonaqjaılylyǵy úshin alǵys aıtqym keledi", – dedi Túrkıanyń Almatydaǵy Bas konsýly.
Al Jánıa Áýbákirova fleıta men pıanıno syndy mýzykalyq aspaptardan shashý shashylǵan án-saz keshi kúzde taǵy da ótetinin aıtty.
"Elshilik ókilderine shyǵarmashylyq jobamyzdy qoldaǵany úshin alǵys aıtamyn. Shyǵarmashylyqta bári óte qarapaıym – mýzykanttar kezdesip, kompozısıalardy birge oryndaýǵa kelisedi. Alaıda, halyqaralyq shekarany eńserý úshin bizge memleket pen elshilik ókilderi, demeýshiler kómektesedi. Lelá Baıramoǵullary óte úlken áleýmettik jumys júrgizip keledi. Ol álemniń túkpir-túkpirindegi tyńdarmandardy mýzykamen tanystyrý úshin álemdegi ártúrli halyqtarmen kezdesip, óz ónerin pash etip júr. Bul mýzykany shyn súıetin júregi úlken mýzykanttarǵa tán qasıet. Búgingi konsert kúzde Shýbert pen basqa kompozıtorlardyń baǵdarlamasymen qaıta ótkiziletinin atap ótkim keledi", – dedi Jánıa Áýbákirova.
