Almaty qalasynyń ákimi Erbolat Dosaev megapolıstiń Almaly aýdanyndaǵy jańa skverdi abattandyrý jobasyn qarap shyqty, dep habarlaıdy almaty-akshamy.kz.
Qala basshysy jergilikti turǵyndardyń ótinishi boıynsha Raıymbek – Seıfýllın - Tórequlov – Muratbaev kósheleriniń mańyndaǵy qıraǵan nysandardyń ornyna jańa qoǵamdyq keńistik qurýdy tapsyrdy.
«Altyn Sapa ALM» JSHS ınvestory Seıfýllın dańǵyly boıyndaǵy eki eski turǵyn úıdi jáne burynǵy TQQ ǵımaratyn buzǵan. Áleýmettik jaýapkershilik aıasynda ınvestor óz esebinen Seıfýllın dańǵyly men Mámetova kóshesiniń qıylysynda aýdany 0,30 ga jańa skverdi abattandyrady.
Almaly aýdanynyń ákimi Arman Shamshın qazirgi ýaqytta skver paıda bolatyn ýchaskede qalanyń jer qatynastary basqarmasy 35 menshik ıesiniń 16 - nan jyljymaıtyn múlik satyp alǵanyn baıandady. Qurylys jumystary jyljymaıtyn múlik barlyq menshik ıelerinen satyp alynǵannan keıin aǵymdaǵy jyldyń qazan aıyna josparlanǵan.
Baıandamany tyńdaǵan qala basshysy belgilengen josparǵa sáıkes jumysty jalǵastyrýdy tapsyrdy.
Aıta keterligi, Almatyda Esentaı, Úlken Almaty ózenderiniń boıyndaǵy jaǵalaýlarǵa rekonstrýksıa júrgiziledi. Pýshkın kóshesi boıymen Gogol kóshesinen Raıymbek batyr dańǵylyna deıingi uzyndyǵy 1,1 km jaıaý júrginshiler aımaǵyn abattandyrý josparlanýda.