Operasıany Saýd Arabıasynan kelgen profesor Muhamed Sallah Alreshhıdan jasady
Almatydaǵy Kardıologıa jáne ishki aýrýlar ǵylymı-zertteý (ǴZI) ınstıtýtynyń bazasynda TMD boıynsha alǵash ret júrek qaqpaqshasynyń jańa bıologıalyq protezin ımplanttaý operasıasy jasaldy, dep habarlaıdy Almaty-akshamy.kz QazAqparatqa silteme jasap.
52 jáne 60 jastaǵy eki naýqasqa biregeı operasıany Saýd Arabıasynan kelgen profesor Muhamed Sallah Alreshhıdan jasady. Oǵan elimiz óńirlerindegi jetekshi kardıohırýrgıa klınıkalarynyń kardıohırýrgtary qatysty.
ǴZI basqarma tóraǵasy Marat Pashımovtiń aıtýynsha, búginde medısınadaǵy jańa tehnologıalar myńdaǵan adamnyń densaýlyǵyn qalpyna keltirýge kómektesedi.
«Búgin bizdiń klınıkanyń bazasynda TMD aýmaǵynda alǵash ret Saýd Arabıasynyń jetekshi kardıohırýrginiń qatysýymen júrektiń qolqa qaqpaqshasyn aýystyrý úshin sońǵy býyndaǵy bıologıalyq protez ımplantasıalandy. Bul bıologıalyq júrek qaqpaqshasynyń protezi klapan ınovasıasynyń 40 jyldan astam tájirıbesine negizdelgen. Tájirıbedegi eń úzdigi jınaqtalyp, búkil álemdik tájirıbeni biriktire otyryp, jańa býyn klapany quryldy, ol joǵary gemodınamıkalyq kórsetkishterimen, paıdalaný jeńildigimen jáne beriktigimen, Varfarındi qoldanýdyń qajettiliginiń bolmaýymen erekshelenedi», - deıdi Marat Pashımov.
Dárigerdiń sózinshe, mıtraldy qaqpaqsha aqaýlary bar eki naýqas júrek aımaǵyndaǵy aýyrsyný, fızıkalyq júkteme kezinde entigý, tez sharshaý jáne taǵy basqa shaǵymdarmen stasıonarǵa túsken. Olarǵa hırýrgıalyq aralasý usynyldy.
«Júrek qaqpaqshalaryn protezdeý tehnologıalary úzdiksiz damyp keledi. Júrek qaqpaqshalaryn protezdeý operasıasy júrekke qan aǵymyn qalypqa keltirý jáne júrek jetkiliksizdiginiń damýyna jol bermeı, júrekke qosymsha júktemeni joıý úshin júrgiziledi. Asqyný qaýpi joǵary naýqastarda, sondaı-aq egde jastaǵy adamdarda júrek qaqpaqshalarynyń bıologıalyq protezin qoldanǵan jón. Bıologıalyq qaqpaqshalardyń mańyzdy artyqshylyǵy – qandy suıyltatyn dárilerdi – antıkoagýlánttardy ómir boıy qabyldaýdyń qajeti bolmaıdy», - dep atap ótti kardıohırýrgıa bólimshesiniń meńgerýshisi Rústem Tóleýtaev.
Dárigerlerdiń aıtýynsha, jańa býyn júrek qaqpaqshasynyń bıologıalyq protezi ońaı jáne uzaq qyzmet etedi. Bul qaqpaqshanyń qyzmet etý merzimi standartty klapandarǵa qaraǵanda uzaǵyraq.
«Qaqpaqsha ımplantasıasy úshin standartty tásil de, sternotomıany qajet etpeıtin az ınvazıvti tehnıka da qolaıly, bul keýde qýysynyń qańqasyn saqtaýǵa, ınfeksıalyq asqynýlardyń qaýpin azaıtyp, aýyrsyný sındromyn tómendetýge kómektesedi. Sondaı-aq, operasıadan keıingi kezeńde tynys alýdy jeńildetedi, uzaq ýaqyt boıy korset kıý qajettiligin joıady jáne qalypty ómirge tezirek oralýǵa múmkindik beredi», - dep túsindirdi kardıohırýrgtar.