5 maýsym — Dúnıejúzilik qorshaǵan ortany qorǵaý kúnine oraı Almaty memlekettik bıznes koleji men İle Alataý ulttyq tabıǵı parkiniń Medeý fılıaly birlese otyryp, erekshe formatta ekologıalyq shara ótkizdi. «Taza Tabıǵat» dep atalǵan bul is-shara eko-kvest túrinde uıymdastyrylyp, jastardyń ekologıalyq sana-sezimin arttyrýdy kózdedi.
Kvestke 100-ge jýyq stýdent, kolej ákimshiligi, oqytýshylar, ormanshylar men ekolog mamandar qatysty. Qatysýshylar tórt komandaǵa bólinip, tórt túrli beketten turatyn baıqaýda baq synasty. Ár kezeń qorshaǵan ortany qorǵaýǵa baǵyttalǵan naqty is-áreketterge negizdeldi:
- «Jına — jeńiske jet» bóliminde qatysýshylar orman aýmaǵynan qoqys jınap, tazalyqqa úles qosty;
- «Eko-vıktorınada» tabıǵat pen ekologıaǵa qatysty suraqtarǵa jaýap berdi;
- «Eko-selfı» beketinde tabıǵat aıasynda kreatıvti sýretke túsip, áleýmettik jelide ekosana týraly úndeý jasady;
- «Qaıta óńde de jeń» tapsyrmasynda jınalǵan qaldyqtardy qaıta óńdeý joldaryn usyndy.
Komandalar arasynda tartysty báseke ótip, upaılar eseptelip, jeńimpazdarǵa gramotalar men baǵaly syılyqtar tabystaldy.
Ekologıa – ult bolashaǵyna qyzmet etetin qundylyq
İs-sharany ashqan Almaty memlekettik bıznes kolejiniń dırektory Aınur Qýanyshqyzy qorshaǵan ortaǵa degen súıispenshiliktiń tárbıeden bastalatynyn atap ótti.
«Tabıǵatty aıalaý — bul bir kúndik aksıa emes, kúndelikti ómir saltymyzǵa aınalýy tıis. Jastarymyzdy tek bilimdi ǵana emes, ekologıalyq saýatty, sanaly tulǵa retinde tárbıeleý – bizdiń basty maqsatymyz. Búgingi shara – sonyń naqty kórinisi», – dedi ol.
Kolejdiń tárbıe isi jónindegi orynbasary Juldyz Qurmanáli de stýdentterdiń belsendiligine rızashylyǵyn bildirip:
«Ekologıalyq tárbıeni qyzyqty ári este qalarlyq formatta ótkizý – mańyzdy qadam. Kvest formaty jastarǵa unaıdy, ári olar naqty áreket arqyly tabıǵatpen baılanysyn sezinedi», – dedi.
Ormanshylar ún qosty: tabıǵat – amanat
İle Alataý ulttyq tabıǵı parkiniń Medeý fılıalynyń basshysy Baqtıar Nurlanuly jastardyń tabıǵatqa degen janashyrlyǵyna oń baǵa berdi:
«Biz tek tabıǵatty qorǵap qana qoımaı, ony bolashaqqa aman-esen jetkizýimiz kerek. Bul úshin jastardyń belsendiligi asa mańyzdy. Osyndaı bastamalar arqyly tabıǵatty súıý — jańa urpaqtyń daǵdysyna aınalady dep senemiz», – dedi ol.
Fılıal ekology, sharaǵa qatysqan Araı Qalıbekqyzy da ekologıalyq bilim berýdiń mańyzyn atap ótti:
«Jastarymyz tek tazalap qana qoıǵan joq, qaldyqty qalaı qaıta óńdeýge bolatynyn da usyndy. Bul — sanaly qoǵamnyń belgisi. Biz tabıǵatqa tutynýshy emes, seriktes retinde qaraýymyz kerek», – dep pikir bildirdi.
Prezıdent Toqaevtyń úndeýimen úndes shara
Qazaqstan Prezıdenti Qasym-Jomart Toqaev óz Joldaýlarynda birneshe márte qorshaǵan ortany qorǵaý máselesin basa aıtqan bolatyn. Ol:
«Ekologıany qorǵaý — barsha azamattyń basty mindeti. Tabıǵatty saqtaý — keler urpaq aldyndaǵy boryshymyz» — dep atap ótken.
«Taza Tabıǵat» ekokvesti — osy úndeýge berilgen naqty jaýap. İs-shara jastardy tabıǵatpen úndestikke, ortaq jaýapkershilikke, ujymdyq jumysqa baýlyp, ekologıalyq mádenıetti damytýdyń sátti úlgisine aınaldy.
